قررت اعرف ومصدقش

بسم الله الرحمن الرحيم

اعزائي قراء المدونه,تحيه طيبه وبعد:

موضوع النهارده موضوع هاممني جدا,جدا لخطورته وحيويته,واخرها واللي انا شايف انه من اثاره اضراب 6 ابريل, الموضوع ده هو:

الاعلام واثره في المجتمع وخاصه الصحف.

انا اعرف ان الصحافه في زمانا دلوقت بقت 3 انواع: مؤيد وهو الحكومي زي اهرام,اخبار,جمهوريه ومعارض زي الدستور,الغد, ومستقل زي المصري اليوم والشروق.

تيجي تقرا في الحكومي,تشوف الدنيا جميييييييييييييله,بمبي بمبي بمبي,مفيش مشاكل,كل يوم انجازات,كل يوم علاقات دوليه جديده,كل يوم اخبار عن تطورات واصلاحات وتشييد وتطوير واستثمار اجنبي,وحاجه جميله,والحاجات دي بتبقي صح طبعا مش عناوين وخلاص,بس كلها اخبار حلوه اوي وتحسسك ان مصر مفيش اجمل من كده.

تيجي تسمع لاي خبر منيل,تلاقيه متصدر جرايد المعارضه. تقرا المعارضه,سواااااااااااااااااااااد قاتم,مفيش اي حاجه عدله في البلد,كله زفت,اعتقالات,انهيارات,فساد مسئولين, وكأن الاخبار دي اخبار بلد تانيه خالص غير البلد اللي الجرايد الحكوميه بتتكلم عنها.

نيجي بقي للصحافه المستقله,اخبار تالته ومختلفه تماما عن النوعين الاولانيين,طبعا كل واحده منهم لازم بيبقي فيهم نسبه اخبار مشتركه لان المفروض ان البلد اللي بيتكلموا عنها واحده. المهم,اكتر حاجه استفزتني في الصحافه المستقله السبق الصحفي بتاعهم اللي كل يوم يجيبولنا خبر ما شاء الله واقرأ التعليقات تحت والاقي الدنيا خربانه وشتايم ودي بلد زفت,وتاني يوم تلاقي خبر بينفي الخبر الاولاني,لا حول ولا قوه الا بالله,طب ما كان من الاول ياعم الحج. علي سبيل المثال: نشروا خبر يقولك وثائق وااتفاقيات سريه بين الجامعه الامريكيه ووزاره الدفاع الامريكيه(البنتاجون).....يانهار اسود,كلام يخض. تيجي الاعلاميه مني الشاذلي في برنامج العاشره مساءا علي قناه دريم 2 تعمل تحقيق في الموضوع ويتكلموا ويجيبوا مدير تحرير الجريده ومستشار الجامعه الامريكيه وواحد مسئول كبير من وزاره الصحه ويقولك كل ده ولا سري ولا غايه, الهيئه دي اللي اسمها NAMRU 3 (Navy medical research unit 3 موجوده من ايام الحرب العالميه التانيه وبتتعاون-بل ولا تعمل- دون تصريح من وزراه الصحه,وكلام زي الفل. يعني ولا نظام مخابرات سريه ولا امريكا هتهجم علينا بكره.

حاجه تاني,ساعه ما صدر قرار اقاله محمود ابوزيد وزير الري السابق,بص كده علي العنوانين الجاييين دول:

فيبقي ايه شعورك بقي لما تشوف الخبر ده اليوم اللي بعده:


بالله عليكم مش حاجه تنقط. يعني اصدق ايه واكدب ايه. كشفنا الحقيقه,السبق الصحفي معانا,ويالا,اي كلمتنين يتسمعوا ينزل بيهم مقال ومش مهم سمعه الناس ولا الجمهور,المهم السبق.


شوف ده كمان:
ويجيلك الخبر ده اليوم اللي بعده:



شفت كمان الخبر الخطير ده:
يانهااااااااااااار,ده جرار من الجرارات الجديده اللي مصر جابتها,ده جرار من الجرارات اللي السواقين حذروا منها,اهو طلع كلامهم صح,حسبي الله ونعم الوكيل,ولسه.

.............................استني بس متمشيش,مهو طلع غلط زي باقي زمايله:




في حاجه تغيظ اكتر من كده. ممكن تقول ان ده كويس للجريده انها لما بتعرف الحقيقه بتعلنها وده بيأكد مصداقيه الجريده,وعندك حق في ده,بس مش ده اللي عايز اوصله,انا مش عايز اشكك في جريده او امدح جريده,انا عايز اوصل لنتيجه معينه وهيا الاتي:

1- بافتراض ان كل الاخبار اللي بتتنشر في الجرايد التلاته( الحكوميه,المعارضه,المستقله) كلها صحيحه. بالتالي من المستحيل علي اي جريده انها هتضم الاخبار دي كلها في عدد واحد, لا عدد صحفيين هيكفوا يغطوا كل اخبار مصر,ولا سعر طباعه مناسب للمواطن هيخليه يشتري مجلد بدل جريده عشان يعرف الاخبار. الجريده ليها عدد صفحات متقدرش تزيد عنه عشان تكلفه الطبع وتكلفه البيع,يبقي بالتالي....


2- عشان اعرف الحقيقه كلها,لازم اشوف الاراء كلها,مينفعش اقرأ معارضه بس لاني هشوف الدنيا سودا وهكره البلد دي وهنقم عليها,ولان بعض الصحف بيكون هدفها المعارضه للمعارضه مش للافاده,ومينفعش اقرا الحكومي بس لاني لازم اسمع الرأي الاخر عشان يبقي في مناخ علمي صحي ديمقراطي والرأي والرأي الاخر وندفع عجله التنميه للامام,لان اللي بينقد بيشوف حاجات انا مش شايفها(ده بافتراض انه نقد بناء). ومينفعش اقرأ مستقل بس لانها مش بتضم كل الاخبار,وكمان عشان زي ما وريتكم بعض الامثله اللي ممكن تعمل
بلبله عند الواحد لو مكانش بيتابع وأخد خبر واحد من الاخبار دي ومعرفش الجديد.

3- ولأن البني ادم الطبيعي بيبقي وراه شغل ومصالح ومش فاضي يفرد كل الجرايد بكل انواعها ادامه عشان يستخلص الحقيقه,وبالتالي استحاله يتابع اكتر من مصدر,وبفرض انه عايز يعرف الحقيقه فعلا(لانه لو من الاساس عايز يعارض,هيقري معارضه,وهكذا),يبقي مفيش ادامه غير انه يعمل اللي كاتبه في عنوان تدوينتي: هعرف ومش هصدق. انا هعرف ان في حدث فلان حصل,بس مش هصدقه,هعتبره ضمن سلسله اضف الي معلوماتك,والله لو المعلومه اتأكدت من مصدر موثوق منه وكل الناس مع الزمن اجمعت عليها,خلاص,ابقي عرفت حاجه حقيقيه حصلت,انما بخلاف ده,انا مش هسلم دماغي وحياتي لخبر ممكن بعد ثانيه الاقيه غلط.

وارجع للبدايه,زي ما قلت حاجه زي اضراب 6 ابريل ده الاعلام بيأثر فيه بقوه. لما يبقي شباب كله شايف الدنيا سوده ادامه وعنده ازمه ثقه ومش قادر يتخيل او يصدق ان في حاجه حلوه في البلد بتحصل,وان جرايد الحكومه دي كلها كدب وافتراء,والحقيقه مع المعارضه,طبيعي جدا انه يعمل اضراب ويبقي ناقم.وهكذا,انت اتشحنت ولازم هتفرغ. ولازم كلنا يبقي عندنا قيم واهداف ومنرضاش بالغلط ولازم نصلحه,بس قبل الخطوه دي,لازم ابقي عارف اني صح,مش ضحيه فرقعه ولا حد مستغلني او مستغفلني وبيحركني عشان اهدافه هو.

الصحافه والاعلام بيتحكموا في نفسيه شعب كامل مش فرد ولا مجموعه صغيره,ده شعب. لازم نراعي ربنا في اللي بنكتبه,لازم يبقي هدفنا مصلحه البلد ونراعي الدقه في الاخبار.



واخيرا,حاجات لاحظتها:

1- الاهرام جريده محترمه جدا ومصداقيتها عاليه,وعايز تعرف اي خبر عن اخر اعمال الحكومه,يبقي عليك وعلي الاهرام,وعايز تقرا لكام كاتب محترمين وخبرتهم في الحياه كبيره,يبقي عليك وعلي الاهرام.

2- المصري اليوم جريده محترمه وليها سبق صحفي فعلا في حاجات كتير,وطبيعه الاخبار اللي بتغطيها مختلفه تماما عن الاهرام,وانا شايف انه عشان يبقي عندك 80% من اخبار البلد,اقرأ الاهرام والمصري اليوم بالمبدأ اللي انا ماشي عليه: اعرف ومتصدقش.

3- من 3 سنين كده يمكن ولا 4 مش فاكر قريت شويه في المعارضه,حسيت ان الدنيا سودا ومفيش خير ابدا في الدنيا,اعتزلتها,عشان انا عايز ابقي متفائل وعايز اللي يحسسني انه في امل عشان اعرف اكمل حياتي,مش اللي يأسسني ويحبطني.

ومعلش كالعاده,طولت عليكم اوي,بس اتمني تشاركوني الرأي في الموضوع اللي بيهمني اوي ده وتقوليلي رأيكم في المبدأ ده.

والسلام عليكم ورحمه الله وبركاته.