Tuesday, February 17, 2009

هل هناك علاقه بين النظري والعملي في الهندسه

بسم الله الرحمن الرحيم

الموضوع اللي هتكلم عنه ده من المواضيع اللي بتهمني جدا واللي لمستها اول ما دخلت كليه الهندسه, وزادت معايا في فترات تدريبي في الاجازات الصيفيه في المصانع, ومتوقع انه يزيد معايا اكتر في الفتره الحاليه اللي بعمل فيها معيد في الجامعه الا وهو موضوع العلاقه بين النظري والعملي في الهندسه.


السوال اللي بيبقي علي كل لسان طالب في هندسه(واخص بالذكر الهندسه الميكانيكيه لاني عشت التجربه دي ولا اعلم ما في سواها من التخصصات) انه هل فعلا في علاقه بين الكلام النظري اللي بدرسه والواقع العملي اللي بشوفه بره. ولما تسأل طالب مش بتيجي الكليه ليه يقولك عشان ايه لزمه الكليه,شويه معادلات وكلام بيترص ادامي ولا فاهم منه حاجه وببصمه,وبره في الواقع العملي بشوف دنيا غير الدنيا وكل الكلام ده ملوش لزمه.

بصراحه ومن وجهه نظري, الطالب عنده حق وفي نفس الوقت مخطئ. في الاول هبدأ بخطأه الا وهو الترديد او ثقافه البغبغانات(دون قصد الاهانه او التجريح). الطالب بيكون مجربش اي حاجه ومحاولش يستفاد من الكليه وسمع زمايله الاكبر منه واللي بالطبع اصحاب خبره كبيره في نظره وهما في الاصل معندهمش خبره اصلا يقولوله" ياعم سيبك,كليه ايه وهبل ايه,دا انا خالي دلوقت مدير مصنع كذا وبيقولي ولا استفدت حاجه من الكليه,ثانيا هما الدكاتره اللي عندنا دول دكاتره,الواحد فيهم حافظله كلمتين بيرصهم ولا فاهم منهم حاجه,ياراجل,علاقه ايه بس,دا انت طيب".

خطأ الطالب اولا انه استمع لكلام واحد صدقه علي طول من غير ما حتي يجرب,ودي ثقافه مجتمع كامل,اطلاق الاشاعات وتصديقها دون التحقق من صحتها. والخطأ التاني انه استمع لرأي واحد(سواء شخص او اتجاه فكر),فمعندوش الرأي والرأي الاخر اللي يخليه يقارن ويشوف ويحفز عنده رغبه التجربه واثبات اي الرأيين هو الصحيح. والخطأ التالت ويمكن الاخير في رأيي وهو كسله وتقاعسه عن انه يكون هو اللي بدأ واخد المبادره واثبت ان فعلا في علاقه وطيده بين النظري والعملي.

والطالب يعتبر محق الي حد ما فيما ذكره عن الدكاتره(مع التحفظ علي الاسلوب في ابداء الرأي). اكيد في كل حاجه فيه الكويس والوحش. بس مادام مصر فيها علماء في كل المجالات,يبقي مش هو ده الاتجاه او التوصيف الشامل للدكاتره. وان كان حظه وقعه في واحد عقليته مش حديثه,دا مش سبب انه هو كشحص وكيان عايز يحقق ذاته انه يعتمد علي نفسه ويلتمس الطرق الاخري. ايضا الدكاتره احيانا يتكون معذوره. معامل قديمه,طلبه جايه من ثانويه عامه مش فاهمه حاجه وتسد النفس ولو مؤاخده,عدد كبير جدا يصعب متابعته,والنقطه الهامه والحساسه في الموضوع ده وهو الاوضاع الماديه. ازاي يبقي واحد عضو هيئه تدريس والمفترض انه يكون عـــــــــــالم,يبقي اكثر اهتمامه-وهو مجبر علي ذلك- ازاي يوفر لنفسه حياه كريمه بالتماس مصادر رزق مختلفه(مش حتي يبقي ملياردير). مش الاولي انه بدل ما يستهلك وقته ده في التماس مصادر رزق متنوعه ومختلفه انه كان يكرس وقته ده في العلم وخدمه المجتمع.يبقي المفروض انك فعلا لو عايز تعمل تعليم صحيح يبقي تخلي الناس المسئوله عن التعليم متفرغه ليه وسعيده وهيا شغاله في تعليم وتربيه وتخريج اجيال. الفكره مش في عدد المدارس والجامعات اللي كل يوم بتتفتح,الفكره في جوده الخدمه اللي بتقدم داخلها.


اخر نقطه تتعلق بالنظري والعملي وكيفيه الربط بينهم ومن واقع تجربتي الشخصيه البسيطه بالطبع لاني اعتبر برده في ذلك الوقت لسه خريج جديد وتجربتي مش الضخمه(ولا اخجل من ذكر ده), ان العلاقه بين النظري والعملي اكيده,بس في حاجه تانيه موجوده في النص هيا اللي بتربط الاتنين دول ببعض,ومدي قوتها عند الفرد هيا اللي بتخليه انسان ناجح وحاسس بقوه العلاقه دي الي وهيا ما يسمي modeling.


الشكل ده هو اعتقادي في العلاقه بين التلات عناصر الظاهرين دول واللي متصلين ببعض بسهم ذو اتجاهين(رايح جاي). في مرحله الدراسه الخاصه بالطالب بيكون الاتجاه من النظري للعلمي. فالطالب او الباحث بيتعلم محتوي نظري,لما يكون عنده القدره علي الmodeling قويه بمعني لو بيقدر يتخيل تطبيق المعادله دي او النظريه دي ازاي في الواقع,بيوصل لمرحله العملي بسهوله وهو واثق ان الاصل في قوته العمليه هو اساسه النظري. انما لو كان ضعيف في مرحله الmodeling الوسيطه دي,وكطبيعه شغله كعملي بيكون اشبه بالحرفي غير الدارس للهندسه,فالفرق بينهم الاساس النظري ولكن ضعف قدرته علي الmodeling او تخيل العلاقه خلاه يشعر بعدم الارتباط بين النظري والعملي.

في مرحله حياته العمليه بعد انتهاء دراسته بتكون العلاقه عكسيه,اتجاهها من العملي للنظري بمعني, انه ادامه واقع عملي, لو عنده modeling قوي هيعرف بسهوله يترجم المشكله العلميه بتاعته لمسأله زي اللي كان بيحلها وهو طالب وبسهوله هيعرف يحلها حل نظري دقيق وبالتالي هيفضل طول عمره حاسس انه فعلا مهندس مش انسان الي ماشي بمبدأ شيل ده من ده يرتاح ده عن ده.

زي ما اشرت من لحظه, الmodeling هيا المسائل اللي كنا بنحلها واحنا طلاب. لما تيجي مسأله بتوصف مشكله وبيقولك افترض ان كذا مهمل وناخد تأثير الظاهره دي معانا في الاعتبار, كل ده في الاصل جاي من واقع عملي. يعني مش تأليف ولا خيالات. المشكله فيك انت انك مش عارف تعمل التحويله دي وده طبعا ليه اسبابه اللي سأشير اليها الان واذكر مطالبي وامنياتي معاها برده:

اولا: من اسباب ضعف الموضوع ده عند الطالب هو عدم قدره عضو هئيه التدريس علي ايصال المعلومه اما لافتقاده المهاره دي اللي بتتفاوت من واحد لاخر,واما لضياع مستوي الطلبه واللي بتحسسه انه بيتعامل مع اطفال مش طلبه جامعه والتزامه بمنهج ووقت يخليه ميقدرش يشرح كل حاجه بالتفصيل, واما واهو اقوي الاسباب كسل الطالب في البحث عن المعلومه واعتماده علي سياسه( افتح دماغي وصب) وانه عايز المعلومه بالمعلقه من غير ما يفكر ولا يشغل مخه ولا اي حاجه.


ولذلك,فاني اطالب في مدونتي المتواضعه بسد باصلاح العيوب وسد باب الحجج والشكاوي(لو كانوا فاكرين اننا بنتحجج علي الفاضي) عن طريق:

1- الاهتمام بمستوي الطالب التعليمي قبل وصوله لمرحله الجامعه عن طريق الاهتمام بالمدارس والمدرسين وعقد الدورات التدريبيه الحديثه لهم وتحديث المناهج باستمرار لتتناسب مع ما يدرس في العالم اجمع وتؤهله لمرحله دراسته الجامعيه والواقع العملي الخارجي.

2- التنسيق بين وزاره التربيه والتعليم ووزراه التعليم العالي في احداث تجانس وترابط بين المواد اللي تدرس قبل المرحله الجامعيه وبعدها حتي لا يشعر الطالب ان ما درسه سابقه لا اهميه لا وكأنه اضاع عمره هباءا.

3- الاستزاده من تشجيع العلاقه بين الصناعه والجامعات وتعميم تلك المبادره وجعلها في صوره خدمات تقدم للصناعات والشركات والمصانع التي تهتم بتدريب اعضاء هيئه التدريس داخل مؤسساتها في صوره تخفيف ضرائب,اقامه حملات اعلانيه بأسعار مخفضه لهم في الاعلام المحلي وخلافه........ذلك ان المؤسسات حاليا تهتم بتدريب الطلبه فقط, والاهم في وجهه نظري هو تدريب عضو هيئه التدريس (وانا لا اخجل من طلب ذلك لان العلم ليس حكرا علي قطاع الجامعات او القاب من عضو هيئه تدريس او مهندس عملي وخلافه),ذلك ان عضو هيئه التدريس هو الذي يقوم بأعداد عقل الطالب للواقع العملي,فالاولي ان يتم تدريبه واطلاعه علي اخر ما توصلت اليه الصناعه حتي يستمتع الطالب بدراسته وحتي يكون جاهزا للواقع العملي مباشره بدايه من تخرجه.

4- تحقيق المستوي المادي الكافي لمعيشه كريمه لاعضاء هيئه التدريس حتي يتفرغوا لاعباء المهمه التعليميه واعداد اجيال قويه.


واخيرا,هذا بعض من كل,ولكن هذا ما اشعر باهميته القصوي في تلك المرحله التي اعيشها. وان كان ماهو محقق حاليا من هذه المطالب فالحمد لله وبأذن الله سأسعي في العمل بها,وان لم يكن منها ما هو محقق,فادعوا الله بصلاح الاحوال. واعوذ بالله من ان اقول قولا بلا عمل,ومن سر يخالف العلن. والله ولي التوفيق,والسلام عليكم ورحمه الله وبركاته.

3 comments:

  1. معاك حق طبعا في كل اللي انت بتقوله...وبصراحة انا شايف زي ماقلتلك من كام يوم لما كنا مع بعض....حل المسائل مش كفاية بالعكس.....الاحسن طبعا اني اهتم بالجانب النظري للطالب عن حكاية حل المسائل والكلام ده...دي حاجة...الحاجة التانية طبعا ان لازم النظري ده يكون مرتبط بالواقع ومايكونش بعيد عنه..بصراحة انا شايف ان انسب حاجة ممكن تتعمل لاهي تعاون مع الوزارات ولا على اي مستوى حكومي لكن زي ماقلت عن طريق التعاون مع القطاع الخاص لانهم هما دلوقت اللي بيتعاملوا مع كل جديد

    ReplyDelete
  2. (على فكرة صحيح...احنا لغاية دلوقت مانعتبرش اعضاء هيئة تدريس...لكن التعبير الادق...معاونين لهيئة التدريس...خليك دقيق...:))

    ReplyDelete
  3. حبيب قلبي,مقدرش اوصفلك فرحتي انك شرفت مدونتي وعلقت علي تدوينات ليا لشعوري الاكيد اني هستفاد منك لاني بحترم عقليتك جدا,ولكن لي علي تعليقك هذه الملحوظات:

    1- اول حاجه هعملها ان شاء الله اني هستبدل كلمه عضو هيئه تدريس اللي كنت كاتبها دي واللي نبهتني ليها بكلمه معيد في الجامعه وهلونها عشان اي حد جديد يقرا الموضوع يعرف ان كان في غلطه واتصلحت,بس فعلا انا مكنتش اعرف كلمه معاون دي غير بعد البوست ده بفتره كبيره نستني اني كاتب الكلمه دي ومحتاجه تصحلح,الف شكر علي لفت الانتباه.


    2- موضوع التعاون بين الوزارات والتعاون مع القطاع الخاص ده مفيش مجال للربط بينهم اساسا عشان احطهم في مقارنه زي ما انت قلت. انا كنت بقول عايز يبقي في(زي ما بيحصل دلوقت والحمد لله,او وكان بيحصل من زمان وانا معرفش احقاقا للحق) تعاون بين وزاره التربيه التعليم ووزاره التعليم العالي,بحيث زي ما بعض الاصدقاء قالولي في بعض الجامعات في العالم بتدرس الطب علي 6 سنين بس لانهم بيعتمدوا علي احياء الثانوي العام هناك,انما هنا في مصر لا,اول كلمه بيسمعوها,انسي كل اللي اتعلمته في ثانويه عامه ويبدأوا معاك من الاول,وقيس علي كده,وجود تنسيق بين الوزراتين هيحسن العمليه كتير وده اللي الحمد لله الدوله بتمشي في اتجاهه دلوقت.اما موضوع القطاع الخاص,فأنا قلت ان الحكومه تزود تشجيعها للتعاون بين القطاع الخاص والجامعات وده بالفعل بقي يحصل الحمد لله. فكل ناحيه من تعاون بين وزارات ومع القطاع الخاص,كل واحد فيهم ليه المجال اللي بيخدم فيه,فأنا مكنتش بفاضل بين الاتنين زي ما ذكرت في مقارنتك. اقراها تاني وشوف

    3- اخر نقطه اعلق ليها وهيا اول نقطه ليك,تتعلق بكلمه المودلنج(اسف لكتابتها بالعربي) وهي المرحله التحويليه بين الظاهره الفيزيائيه والحل الرياضي. احنا لو بنتكلم عن المهندس الميكانيكي كمصمم مش مهندس صيانه,هيبقي محتاج يمشي علي المسار اللي رسمته فوق ده,وهو انه يعرف نظري كويس جدا بمعني ازاي يشتق معادله ويحللها ويطلع بنتيجه ويفهم المعني الفيزيائي للنتيجه دي,وده العلم اللي بندرسه في الكليه,انك تحلها كمصمم.

    انما الواقع في مصر غير كده,الواقع انك بتطلع مهندس صيانه فمتحسش انك درست حاجه ليها لزمه,لانك عايز تعرف اعطال وتتصلح ازاي,عايز تعرف مشاكل هندسيه عمليه وازاي تحلها,وده حاليا بقي موجود من خلال مواد جديده بتنزل عندنا زي تشخيص الاعطال ومواد تاني جميله كلها بتخدم الصناعه.

    بشري حلوه ليك وللقراء كمان,انا اعرف مهندس في الاسمنت قالي انه عضو في مجلس الجامعه وان الجامعه اختارته وبتختار امثاله عشان يحطوا مناهج ومواد دراسيه تتناسب مع الواقع العملي.

    يبقي النقطه زي ما قلتلك,لو احنا بنتكلم علي خريج هيطلع مصمم,يبقي لازم يدرس بالمنطق اللي بيدرس بيه ده,ويبقي هو ده النظري اللي المفروض يتعلمه ويعرف ازاي يحل رياضه ومعادلات تفاضليه,وخلافه,ويعرف فيزيا كويس عشان يعرف يحول المشكله الهندسيه الفيزيائيه لرسم علي الورق يقدر يعملها عمليه تحليل ويطلع نتايج.يبقي لازم يعرف يحل مسائل كويس لانه المفروض يطلع مهندس مصمم.فالمسائل في حالتنا دي مهمه جدا,والنظري العملي يبقي كورس موجود برده,بس مش هيبقي هو الاساس عندنا لو عايزينه يبقي مصمم. انا معرفش انتوا ايه الوضع عندكم في مدني,انا زي ما ذكرت اني بكتب من خلال خبرتي في ميكانيكا,ولو كنت شايف ان في فجوه او اختلاف جوهري بين الاقسام يبقي قولي عشان اغير اسم البوست بدل (الهندسه) لل(الهندسه الميكانيكيه),والف شكر مره تاني علي اهتمامك,وفي انتظار ردك,والسلام عليكم ورحمه الله وبركاته.

    ReplyDelete