كيف انهار مبني التجاره العالميWTC

بسم الله الرحمن الرحيم


اكيد اسم الموضوع غريب.احنا فين و11 سبتمبر فين,وايه اللي فكرنا بالموضوع ده تاني؟....!!!


الفكره ببساطه انا مش بتكلم عن 11 سبتمبر ولا عن عيدميلادي,انما قدرا كده وانا بتصفح النت وقعت تحت ايدي مقاله بتتكلم عن الموضوع ده وحسيت ان فيه هندسه عاليه اوي(كبناء وخلافه عشان متفهمش غلط,ههههههههه).





1- البرج من الناحيه التصميميه



اولا: المبني نفسه كهندسه عالي جدا,فكره كنت اول مره اسمع عنها في الانشاءات(يمكن عشان انا ميكانيكا مش مدني),بس برده البرجين دول التصميم بتاعهم حصل سنه 1960 والمقالات اللي قريتها بتقول انه كان تصميم جديد وقتها برده.



الفكره بتاعه التصميم ببساطه انه البرجين دول عباره عن شويه حديدSteel structure والباقي كله هوا(فراغ يعني)....بص كده علي الصوره الجايه دي:







هتلاقي مستطيل خارجي وجواه مستطيل داخلي,وكل مستطيل ليه سمك ومتقسم لمربعات كتير....ده بالظبط التركيب بتاع البرجين,المستطيل الداخلي ده اسمه (اللب الداخلي)inner core والخارجي اسمه outer core وكل واحد فيهم بيتكون من مجموعه من الاعمده.

الinner والouter core دول,متوصلين مع بعض بواسطه واصله من الsteel structure برده بطريقه معينه بحيث تخلي اللب الداخلي والخارجي ماسكين في بعض تماما وبقوه شديده.


بص كده علي الصوره دي هتشوف الوصله اللي رابطه اللبين ببعض:





والدور بقي بيكون عباره عن بلاطه خرسانيه جاهزه بتتحط علي الوصلات دي اللي بتكون منتشره علي محيط اللبين.

وعشان تفهم الموضوع بتاع التصميم ده كويس,شوف الفيديو ده:




اللب او الcore الداخلي بيكون فيه الاسانسير,الجراج,السلالم وكده,اما اللب الخارجي فهو عشان اعتبارات التصميم,بمعني انه معمول عشان يتحمل الحمل اللي ممكن تسببه الرياح,وعشان يمسك الوصلات اللي رابطه اللب الداخلي بيه,واخر حاجه انه هو الواجهه بتاعه البرج.



2- انهيار البرج


المعروف لدي الناس عامه انه عشان الطيارتين خبطوا في البرجين فالبرج وقع.......لاااااااااا,القصه غير دي خالص.


اولا: في تصميم البرج نفسه,المصمم حط في اعتباره انه عشان البرج مرتفع جدا,ونتيجه ان امريكا جوهها بيشوبه الضباب,المصمم افترض انه ممكن طياره تضل الطريق نتيجه الظروف الجويه وتخبط في البرج.........فالبرج متصمم انه يستحمل اصطدام طائره بيه من نوع وزنها اتقل من الطياره الفعليه اللي خبطت البرج وكمان متصمم ان الطياره اللي ممكن تخبطه بتطير بسرعه اعلي من السرعه اللي الطياره الفعليه صدمت البرج بيها............يبقي الخلاصه انه مش عشان الطياره خبطت في البرج,البرج وقع................امال ايه القصه؟!!!!!


القصه ان الطياره فيها تنك وقود.التنك ده كان فيه حوالي 10000 جالون من الوقود,لما تحصل شراره والوقود ده يولع,هيبقي في حراره كبيره جدا جدا من الاحتراق ده,واللون الاسود المصاحب لصور الاحتراق لما تشوفها علي النت بتأكدلك ان كميه الوقود كانت ضخمه جدا واحنا في الهندسه بنسميه Fuel-rich mixture لان الحريق بيكون غني بالوقود..............بص كده علي الصوره دي هتشوف السواد باين جدا:





الحراره العاليه جدا اللي اتولدت من الاحتراق ده عملت حاجتين اساسيتين:

1- زي ما قلت قبل كده ان المبني كله عباره عن حديد في حديد. المعروف ان الحديد بيفقد حوالي نص مقاومته للتحمل لما يوصل لدرجه حراره معينه(حوالي 450 درجه مئويه). الحريق اللي حصل في البرج كانت درجه حرارته اعلي من ال450 درجه مئويه,عشان كده الحديد (الاعمده اللي بتكون اللب الخارجي والداخلي والوصلات ايضا) مقاومتها علي تحمل الاحمال(اللي بتتمثل في وزن الادوار اللي فوق الدور اللي خبطت فيه الطياره) قلت جدا.


2- تاني حاجه عملتها الحراره,ان عشان الحريق في الاساس حصل في دور من ادوار البرج ومش في البرج كله,بقي في مناطق معينه في البرج درحه حرارتها مرتفعه اوي والبعض الاخر اقل في درجه الحراره وده بدوره عمل اجهاد حراري علي الاعمده الحديد المكونه للبرج وعملها ايضاdistortion او تشوه,فالعمود بدل ما يبقي راسي لفوق بقي مايل ومعوج عشان التشوه الناتج من اختلاف درجات الحراره عليه,وده بدوره اثر برده في قدره الحديد ده علي تحمل الاحمال.




بعد ما شفنا تاثير درجه الحراره علي الحديد وازاي كان عامل رئيسي في انهيار البرج,لازم برده نقول ان الطياره لما خبطت في البرج,شالت عواميد كتير من العواميد اللي شايله الحمل دي. الثلاثه عوامل دول اللي قلناهم مع بعض هما سبب انهيار البرج عند اغلب المحللين(عشان البعض قال ان البرج انتفجر بقنابل مش التفسير اللي قلته ده,بس دي نسبه قليله).


والفيديو الجاي ده بيوريك البرج برده من اول التصميم وتاثير درجه الحراره علي الحديد وازاي بينهار. وبعد ما تشوف الفيديو ده ليا شويه تعليقات ختاميه كده علي الموضوع:








بعد ما شفنا الفيديو ده احب اقول الاتي:


1- احنا قلنا في اول الكلام ان البرج ده 95% منه فراغ بسبب الطريقه المبتكره اللي مبني بيها,عشان كده لما البرج انهار كانت الانقاض بتاعته مش مهوله,بمعني,انها مش شكل انقاض 200 دور مثلا(ان كان عدد ادوراه كده),انما كانت انقاض ارتفاعها يدوب يوصل كام دور بس.........وده عشان مفيش الحوارات بتاعه البنا بتاعتنا دي..طوب,زلط,......الخ.



2- برده قلنا اول الكلام ان البرج عباره عن لب داخلي ولب خارجي ومتوصل ببعض بشويه وصلات.الوصلات دي بنحط عليها بلاطه خرسانيه جاهزه ويبقي الدور عباره عن بلاطتين بس وساندين علي الوصلات دي. عشان كده لما الحمل زاد علي الوصلات في الدور او مجموعه الادوار اللي حصل فيها الحريق وبدايه الانهيار,بدا دور يقع فوق دور(تخيل زي علبه الCDs,كل السيديهات بتشترك في العمود اللي في النص اللي ماسكها),وهكذا...الادوار وقعت فوق بعضها كانها شويه سيديهات محطوطه في العمود اللي في العلبه,وعشان كده المفروض نظريا ان اللب الداخلي او inner core يكون سليم والادوار بتقع حواليه,وده بالظبط اللي الفيديو بيحاول يثبتهولك.



3- الinner core انهار ومفضلش ثابت زي ما شفنا في الفيديو,ده عشان الطياره لما خبطت فيه كسرت عواميد منه فمقدرتش العواميد الباقيه تستحمل كل الاحمال اللي عليها دي,فا انهار.

4- اخر حاجه نلاحظها ان البرج موقعش يمين ولا شمال,دا وقع في مكانه......وده حسب النظريه اللي شرحناها في الفقره رقم 2 واسمها العلمي Pancake theory. والسبب في كده انه مفيش اي قوي عرضيه تسبب ميل البرج وهو بيقع. حتي اصطدام الطياره ميعتبرش ذا قوه ليها تاثير لان وزن البرج اضعاف اضعاف وزن الطياره. كانك رميت طوبه علي شجره مثلا.






واخيرا,الموضوع شيق جدا,وهيبكم مع المصادر اللي جبت منها معلوماتي,وده فهمي اللي ربنا قدرني عليه,وان كان فيه غلط يجزيك ربنا خير لما توجهني واتمني اني اكون عرفت اقدم الموضوع بصوره بسيطه وتفيدكم ان شاء الله.

وهذا ما اعلم,والله اعلي واعلم,وما كان من خير وتوفيق فمن الله وحده,وما كان من خطأ ومن نسيان فذلك مني ومن الشيطان,الله سبحانه وتعالي منه براء...........والسلام عليكم ورحمه الله وبركاته.





المصادر العلميه للموضوع:


http://www.youtube.com/watch?v=qJ11i6fi7KQ&feature=related
http://www.youtube.com/watch?v=otoh2pJpgY8&NR=1
http://www.tms.org/pubs/journals/JOM/0112/Eagar/Eagar-0112.html