مبادره المليون شجره

بسم الله الرحمن الرحيم

اعزائي قراء المدونه, تحيه طيبه وبعد:

اكتب اليكم عن موضوع اسمه" مبارده المليون شجره". فكره اننا نزرع اشجار عشان تبقي مصدات رياح فكره قديمه وعارفينها من زمان. يمكن تكون بتتنفذ دلوقت في اي مدينه جديده بيتخطط ليها علي اساس انه لازم يكون نسبه كبيره من مساحتها خضراء, ولكن اعتقد ان نسبه اننا نزرع في المدن الحاليه اشجار مش في الاعتبار بنسبه كبيره. واقرب مثال, مدينتنا اسيوط لما جينا ننضفها, شلنا كل الاشجار اللي كانت فيها, فيارب يسهل ونرجع نزرعها تاني بالطريقه العلميه اللي المفروض المسئولين يتبعوها.

يمكن نزرع بلدنا تاني. ولكن المره دي بقي مش عشان شلنا 20 شجره, نقوم نزرع 20 ولا حتي 200 شجره وخلاص. دا في اسس المفروض نتبعها. احب اقول في البدايه ان الاشجار دي هامه لعده اسباب منها:

1- كأي نبات, الاشجار دي بتمتص ثاني اكسيد الكربون وبتخزنه جواها وبالتالي بتقلل من نسبه ثاني اكسيد الكربون الموجود في الجو.
2- بتعمل كمصدات هوائيه, اي ان الملوثات بتصطدم بيها وبتقف عندها, مش بتكمل انتشارها لمناطق ابعد.
3- زرع الاشجار في المناطق مرتفعه الكثافه بيلطف الجو وبيحسن نوعيه(جودته) وده بيكون ليه تأثير علي صحه الانسان.

ولزراعه الاشجار, المفروض ان في 3 عوامل اساسيه بتتدخل في اختيارنا لمكان الزراعه وهي: الكثافه السكانيه, نسبه المساحات الخضراء الموجوده حاليا في المنطقه, نسبه الثلوث الموجود في المنطقه. بالنسبه للكثافه السكانيه: بنشوف عدد الناس اللي ساكنين في منطقه معينه ونقسمها علي مساحه المنطقه دي وبنحدد اكبر المناطق اللي فيها كثافه سكانيه, علي سبيل المثال: 5000 شخص/كم.

وبالنسبه لتركيز الملوثات: بنشوف مصادر التلوث الهوائي في المنطقه زي: المصانع, الطرق( لان عوادم السيارات في الطرق بيخرج ملوثات),.... وفي معادلات تقدر تحسب تركيز الملوثات اللي هيوصل لكل منطقه.

وبالنسبه للاشجار او المناطق الخضراء الموجوده حاليا, بنقدر بصوره القمر الصناعي نشوف المنطقه دي متقسمه الوان زي الازرق للمسطح المائي, الاصفر للصحراء, الاخضر للمنطقه الخضرا وخلافه. وبكده بنقدر نحدد بدقه المساحات الخاليه من اي تشجير والمساحات الخضراء بالفعل.

بعد كده بيكون في معادله بتدخل ال3 عوامل دول مع بعض وبنحل المعادله دي لكل منطقه. واكثر منطقه بتكون محتاجه تشجير هي اللي بنبدأ بيها.

في مبادره اسمها مليون شجره زي عنوان التدوينه كده, عاملاها مدينه نيويورك. مبادره جميله جدا. هسيبكم مع الموقع بتاعها.

حبيب اجدد الروح في المدونه المهجوره دي, اتمني يكون الموضوع رغم بساطته, ممتع.

والسلام عليكم ورحمه الله وبركاته.