الحاسه السادسه

بسم الله الرحمن الرحيم

من يومين كده كنت في مكتب دكتور محمود امين-استاذ ميكانيكا الموائع بقسم ميكانيكا,كليه الهندسه,جامعه اسيوط- بناقشه في حاجه كده وكان معايا صديقي-محمود نادي,معيد بنفس القسم- بيستمع للمناقشه. دكتور محمود كلمنا عن جامعات بره ونفسكم تروحوا هناك ولا لا ونعمل ايه عشان نوصل للمستوي العالمي اللي هناك,وقالنا ان في واحد صديقه في امريكا بعتله لنك لفيديو بيوريه فيه ازاي الناس اكتشفت الحاسه السادسه,وقام فاتحلنا اللنك وشفنا الفيديو.

في التدوينه دي انا هشرح ان شاء الله ايه مفهوم الحاسه السادسه اللي توصلوله وهرفق مع التدوينه نفس الفيديو اللي شفته في مكتب الدكتور اللي عرفني الموضوع الشيق ده.



من المعروف ان الانسان ليه 5 حواس: الابصار,الشم,التذوق,اللمس,السمع. يبقي السوال,قرارات الانسان اللي بياخدها,هل في حاسه مسئوله عنها وبالتالي تبقي الحاسه السادسه؟.كنا بنشوف في الافلام واحد بيفكر في موضوع وياخد قرار ويطلع صح ومن قبلها يقولك انا متأكد ان الحل ده صح,لما يبقي فعلا حله صح,تسأله عرفت ازاي,يقولك انا عندي الحاسه السادسه.

توصيف العلماء/فريق البحث لمعني الحاسه السادسه عندهم واللي بيبهرونا باختراعهم ليه حاليا هو انك ازاي يبقي عندك القدره انك تاخد القرار الصح دايما,ازاي امدك بكل الوسائل اللي تخليك متأكد ان القرار اللي بتاخده ده هو الصح من غير ما تغامر.

بس بالطبع هما ما اخترعوش حاجه بتخليك تعرف الغيب,انما هو كل اللي عمله انه اخترعلك وسيله تمكنك انك تعمل بعض قرارتك(زي ما هنشوف طبيعه القرارات دي ايه) اللي كنت بتاخد وقت فيها بسرعه فائقه. علي سبيل المثال: انت عايز تشتري كتاب معين للكاتب الفلاني وميكونشي سعره اكتر من كذا, ما عليك الا انك تخش المكتبه وتبص كده علي الكتب بس والجهاز(الحاسه السادسه) يقولك هو ده الكتاب المناسب. لو انت ماشي في الكليه بتاعتك,ومش عارف مين اللي ادامك ده ومحرج تسأله انت مين او عايز تعرفه قبل ما تكلمه,ببساطه الجهاز بيقولك ده فلان الفلاني,السنه الدراسيه كذا,عمره كذا. لو عايز تعمل مكالمه سريعه,ومعكش موبيل,ازاي تخلي ايدك موبيل تتكلم بيه. لو في مشهد طبيعي عجبك,ازاي تاخدله صوره فوريه وانت معندكش كاميرا. طيب لو انت شاب كوول ومش بتحب تلبس ساعه يد, هل ممكن تبص لايدك بس كده وتلاقي الوقت ظهرلك علي ايدك ولما تعرف الوقت,يختفي من ايدك.

كل ده بيقدمهولك جهاز الحاسه السادسه الجديد,الجهاز ده متوفر حاليا وبسعر 350 دولار,ودلوقت هسيبكم مع الفيديو تشوفوا الكلام ده فعلا ولينا كلام بعد ما يخلص ان شاء الله...................مع الفيديو:

بعد ما شفنا الفيديو العبقري ده,تعليقي عليه الاتي:
1- الجهاز ده عباره عن حاجه عامله زي السلسله بتتعلق علي الرقبه وبتتكون من كاميرا صغيره,بطاريه,مرايه,سماعه.



2- الفكره الاساسيه للجهاز ده هو الاتصال السريع عبر الانترنت وامدادك بالمعلومات من خلاله عن طريق الجهاز ده اللي بيديلك وسائل بتخليك تاخد الdata بتاعتك وتعمل بيها بحث علي الانترنت وتاخد النتيجه,كل ده بس بطريقه سهله وبسيطه وسريعه جدا.

- نلاحظ ده في جزء الفيديو اللي كان بيوريك الطالب في المكتبه وعايز يشوف الكتاب ده ايه بياناته بالظبط. زي ما انت دلوقت تقدر تفتح الكمبيوتر بتاعك وتدخل علي النت ومنه علي موقع امازون وتشوف بيانات الكتاب وكل حاجه عنه....ده بالظبط اللي حصل بس في ثانيه واحده وبنظره واحده منك(ومن الكاميرا بالطبع) للكتاب.

- بالمثل,الطالب ده ليه ID في الكليه معلقه علي رقبته وانت مش شايفه,الكاميرا بتاخدلك الصوره وبتخش بالبيانات ده علي قاعده بيانات المعهد مثلا وتجيلك تفاصيله كلها.

- تذكره الطياره اللي كانت معاه,بص فيها,ظهرله عليها ان الطياره هتتاخر. كان ممكن تعرف الموضوع ده بتليفون للمطار.

كل دي امثله بيوريك ان الجهاز ده عباره عن وسيله سريعه جدا للاتصال بالانترنت والحصول عليه من المعلومات عن طريق........نظره!!!.

3- الفكره الاساسيه الاخري في الموضوع ده هو الكاميرا وتقنيه الImage processing and recognition. فهو كل اللي بيعمله انه اخد البيانات اللي عايزها من كاميرا وعمل عليها processing. وايضا, الكاميرا ده بياخد بياناتها من حركات صوابعك فتعمل لصوابعك عمليه recognition وده اللي كان ظاهر جدا في انك مجرد ما تعمل بصوابعك شكل مربع,تاخد صوره. توسع صوابعك عن بعض, تعمل زووم ان للصوره,تقربهم من بعض,تصغر الصوره. كل ده عباره عن الimage processing and recognition.

- نلاقيه انه قال في الفيديو ان ده كان موجود قبل كده في اختراع ميكروسوفت اللي كان اسمه Microsoft surface table وده بالفعل الحقيقه بس الجديد في جهازهم ده ان الجهاز ده متنقل او portable وبيخليك تتعامل مع البيانات علي اي سطح(ايدك,الحائط,....) علي عكس Microsoft table اللي كانت بتخليك تعمل كده علي الtable بتاعتها بس.

- نفس الموضوع لحركه صوابعه وهو بيرسم ساعه وبيظهرله الوقت,كل ده image recognition. فالجهاز عارف ان حركه زي دي معناها انه يسقط ساعه بالprojector اللي في الجهاز بالتوقيت الحالي.

4- من الحاجات اللي شفناها برده ازاي بيعمل مكالمه تليفون علي ايده,وده في ظني دور ال Projector الموجود في الجهاز,بيعملك Projection لشكل الkeypad علي ايدك,وبيتعرف برده علي حركات صوابعك,ولما بتضغط call بيعمل المكالمه.



5- شفتوا فيلم هاري بوتر,شفتوا لما كان بيقرا جرايد وصور الناس اللي فيها بتتحرك مش ثابته,وكان كل ده خيال علمي,اهو دلوقت بقي حقيقه. بتشوف الجرايد بتتحرك مش صور ثابته والاخبار حديثه. كل ده عن طريق وسائل الاتصال.
- في الصحف العالميه زي الNewyork times او الwashingtonpost,كل نص ساعه لما تخش عليها تلاقي خبر جديد او تعديل في الخبر. دايما بتلاقي الجمله الشهيره دي في صحفهم الالكترونيه علي النت"edited about 3 minutes ago". ففكره تحديث الاخبار من الاصل موجوده في اوروبا وامريكا. ولان الصوره دي في الغالب بتكون في ملف فيويو الصحفي اخده للمتحدث,الجهاز(في اعتقادي لان الفيديو اللي مرفقه في التدوينه مدخلش في تفاصيل) بياخد الصوره دي برده كبيانات مدخله(input) وبيدور في موقع فيديوهات برده زي الyoutube كده وبيشغلك الفيديو في نفس حجم الصوره الموجوده عندك في الجريده المطبوعه.





كل ده بيورينا عبقريه الاتصالات والثوره التكنولوجيه الهايله اللي الناس شغاله فيها. واحنا لسه بنحبي............ربنا يصلح الحال.


اتمني يكون الموضع عجبكم,وفي انتظار تعليقاتكم,والي لقاء قريب ان شاء الله.