بسم الله الرحمن الرحيم
محادثه زي محادثات كتير بتحصل بينا, هفترض ان طرفي الحديث واحد اسمه محمد والتاني اسمه احمد
احمد: انا رايح اعمل انترفيو في شركه كبيره اوي بس خايف
محمد: خايف ليه؟
احمد: مش عارف, حاسس كده اني ههبل فيه ومش هسد
انتهت المحادثه
من هنا استوحيت كتابتي دي وسمتها بكيمياء الشخصيه,لاني ربط بين الموقف ده وبين التفاعلات الكيميائيه.....ولو شفنا المثال الجاي ده:
كنا واحنا في اعدادي يقولك تفاعل الصوديوم مع الكلور يدينا كلوريد الصوديوم,تفاعل الصوديوم مع حمض الكبيريتيك يدينا كبريتات الصوديوم..........هنا نلاقي ان الماده المتفاعله الاولي وهيا الصوديوم ثابته,بس لاننا بنغير الماده المتفاعله التانيه بنلاقي ناتج مختلف تماما لا نتوقع انه يكون ليه ادني علاقه بناتج اخر(كلوريد الصوديوم) ناتج من تفاعل اخر(كبريتات الصوديوم).
انا النفس البشريه والحياه اليوميه بالنسبالي كده,النفس البشريه واحده,انا هو انا,مش هكون النهارده احمد هلاقي نفسي بكره حسين .........شخصيتي كياني ذاتي معايا كل يوم,اللي بيفرق بس المواقف اليوميه اللي بتعرض ليها,وزي ما شفنا في الكيمياء, نلاقي ان المفروض لما اتعرض لموقف جديد هلاقي تصرفات وافعال مني مختلفه تماما عن اي رد فعل كنت اخدته في مواقف سابقه,واحيان كتير جدا بيكون التصرفات دي انا نفسي مش متوقعها ومش عارف جوايا ان فيا القدره والعبقريه دي الا لو كنت اتعرضت للموقف ده.
احنا زي الكمياء.... كل موقف,في تصرف........فبلاش احجم عن خطوات ممكن تكون مهمه ومصيريه في حياتي عشان المقوله الشهيره" انا عارف نفسي كويس", لا صدقني انت متعرفش نفسك خالص,انت كل موقف جديد بتمر عليه بيعرفك حاجه جديده في نفسك انت مكنتش عارفها وكنت محتاج موقف زي ده عشان تعرف انها جواك.
متحرمش نفسك من اكتشاف الجديد في الدنيا والعالم اللي حواليك,متحرمش نفسك من اكتشاف مهارات ومزايا جواك انت مش عارفها,متضيعش علي نفسك فرص وتقول" انا عارف نفسي كويس".
وبكده, اكون قدمت وجهه نظري عن مبدأ مهم في حياتي اسمه" كيميـــــــــــــــاء الشخصيه"
والسلام عليكم ورحمه الله وبركاته
No comments:
Post a Comment