Tuesday, March 31, 2009

مجانيه التعليم-ام جامعات ومعاهد؟!!!

بسم الله الرحمن الرحيم


قريت في جريده الاهرام كلمه عن مجانيه التعليم وهل هي دي المشكله المسئوله عن فساد التعليم في مصر,ولا مش مسئوله. كان الرد في مقاله للكاتب طارق حجي عن تجربه دوله (فنلندا) واللي بيذكر انها من احسن الانظمه التعليمه في العالم حاليا,واللي ذكر فيها:

"وأثناء حوار مع شخصية قيادية في مجال التعليم في العاصمة الفنلندية سمعت وجهة نظر تقول بأن المشكلة ليست في كون التعليم مجانيا أو بمصاريف‏,‏ فالتعليم في فنلندا من الحضانة للدكتوراة مجانا‏(‏ بل ولغير أبناء فنلندا‏).‏ ولكن المشكلة تكمن في فشل العديد من نظم التعليم في إغراء الكثير من أبناء وبنات المجتمع للتوجه للتعليم المهني لخدمة المجتمع خدمة شاملة متكاملة لا يقدر عليها الجامعيون وحدهم‏.‏ في هذا الحوار قالت لي تلك الشخصية الابرز في سياسات التعليم في هذا البلد أن أي مجتمع لا يمكن أن يحتاج لجامعيين أكثر من ربع عدد المنخرطين في العملية التعليمية أما الاخرون فيحتاجهم المجتمع كمهنيين مهرة في عشرات المجالات‏.‏ واذا تمكنت السياسة التعليمية من توجيه الربع أو الثلث‏(‏علي الاكثر‏)‏ للتعليم الجامعي والثلاثة أرباع أو الثلثين للتعليم المهني العصري والراقي فإن المجتمع لن يتلقي فقط مجمل المساهمات المطلوبة لتقدمه وإنما سيتمكن من توفير تعليم جامعي مجاني للمتفوقين والمتميزين‏..‏ أما الاغنياء غير المتميزين فتبقي دائما أمامهم بدائل أخري هي همهم وليست هم المجتمع والدولة".


وده فكر الحكومه حاليا. فالحكومه نفسها وبتسعي انها تقلل نسبه اللي بيدخلوا الجامعه وعايزه توصلهم نسبه 30% من الطلبه والباقي يدخل المعاهد المهنيه الاخري. لان لما يخرج من كليه زي تجاره القاهره زي ما سمعت مره 40 الف واحد في السنه,الناس دي بتروح فين,ملهاش مكان فيشتغل اي حاجه. لما يدخل واحد تربيه عشان مجموعه مجبش هندسه,مش الاحسن يدخل معهد متخصص في الهندسه ويطلع مهني محترم فاهم شغله وليه سعره بدل ما يبقي عبء علي الدوله والمجتمع وقبلها علي نفسه لما يحس انه-لاقدرالله-ملوش لزمه.

انا شايف ان المبدأ ده صح. فعلا عدد الناس اللي تخش الجامعه لازم يبقي قليل,وعلي اد الحاجه,لان فعلا لما العدد يبقي محدود تقدر تتابع الطلبه كلها وترتقي بيهم.انما لما يجيلك 120 واحد في المحاضره والمدرج ضيق وكل واحد ليه سؤاله,لو فكرت تجاوب علي تساؤلات الكل مش هتقدر. يبقي محدوديه العدد بتنفع القائم بالتدريس انه يأدي مهامه بأفضل اداء,وبتخلي الخريج نادر في تخصصه ورايح علي مسئوليه مسبقه ومكان مستنيه بالفعل. وبالطريقه دي الشركات تيجي للجامعه وتبدأ تحجز الخريجين من وقت ماهم طلبه لان العرض علي اد الطلب. وتبدأ الطلبه فيما بينها تتنافس عشان كل واحد عايز يوصل لافضل مكان وده بدوره يدفع العمليه التعليميه للامام.

انا شايف انه مشروع ناجح جدا وانا من الناس المؤيده ليه. وزي ما قلت في تدوينه عصر العلم-الجزء الثاني,ازاي الدكتور مهاتير محمد-مؤسس النهضه الماليزيه-كان بياخد قرارات المجتمع مش بيقتنع بيها في احيان كتيره,وكان بيقدم تنازلات كتيره عشان يقدر يعمل النهضه. احنا كمان لازم نضحي,احنا مجتمع مش فرد واحد عايز مصلحته,ومصلحه المجتمع كله بتتطلب ان المشروع ده يتنفذ لانه بالفعل طوق النجاه.


انما في ثقافه مجتمع سائده ان خريج المعهد اقل من خريج الجامعه اجتماعيا علي المستوي الاول. وانا مش هنكر دي,بس ليه وازاي ممكن نتغلب علي الموضوع ده؟

اما الشق الخاص ب ليه؟, فهو بسبب الثقافه والتربيه.دايما بننظر لخريج المعهد انه اقل في المستوي الفكري وبالتالي في المستوي الاجتماعي بالنسبه لخريج الجامعه. لان خريج الجامعه بيتعلم علوم زي الفيزياء والرياضه(اتكلم عن الهندسه ك كليه والمعاهد الفنيه) وكلها علوم بتفتح العقل وتشجع علي البحث. ولان خريج المعهد لابد ان يتعلم علوم اخري في سنين دراسته.

واما الشق الخاص ب ازاي؟!!, يبقي الحل ان نقدم لطالب المعهد ده العلوم اللي بتقوم بنفس الدور من تفتيح العقل والبحث والمشاركه والتخطيط وغيرها. بحيث يشعر انه انسان قبل كل شيء. ولازم خريج الجامعه يتعامل مع الفني بعد كده-لما طبعا يتخرج من المعهد ويبقي فني فاهم زي ما شرحنا دلوقت- علي انه انسان قبل كل شيء,وانما بيقوم بمهام مختلفه عن مهامه. والمجتمع كله,لابد ان ينشر ثقافه احترام المعاهد والتعاون المشترك الاجتماعي والانساني بين خريجي المعهد وخريج الجامعه.

اكرر,لابد من الارتقاء بالمتسوي الفكري لخريج المعهد,لانه سيكون قوام ما يقرب من 70% من القوه العامله من الشعب,وحتي لا يحدث فصل طبقي بين خريجي المعاهد والجامعات
زي اغنياء وفقراء ودول يسكنوا في احياء راقيه ودول في عشوائيات وكل واحد فيهم ميعرفش حاجه عن التاني وناقم علي الاخر,متعلم وغير متعلم والدكتور يتجوز مهندسه والعامل يتجوز فراشه, خريجي المعاهد هيكونوا هم اساس المجتمع بعد ذلك, لذا, لابد من نشر ثقافه بل والايمان اليقيني بأن خريج المعهد لا يقل عن خريج الجامعه والا ستحدث تفرقه عنصريه اخري.

المشروع لا يحتاج جهد الحكومه فقط لاقراره. الموضوع وغيره الان يحتاج لتضافر جهود الشعب كلها بكل طوائفها وطبقاتها,لاننا نبحث عن سعاده مجتمع كامل وليس فردا او فئه بعينها من المجتمع.

وفي النهايه اقول للمسئولين اني اتحدث نظريا,وانتم عندكم العلم بالواقع وحال الشعب,وما انتم مقدمين عليه سيعمل اعاده تشكيل كامله للمجتمع بأكلمه,لذا وفقكم الله,خذوا حذركم وانتم تضعون هذا القرار. فرغم فائدته,الا ان الخطأ فيه قاتل. واهم ما يجب ان يؤخد بحذر ان يشعر كل طالب مقبل علي الدخول اما الجامعه او المعهد بأنه فعلا يستحق ذلك وان مكانه هو الذي سيذهب اليه. وهذا يحتاج اهتمام كبير جدا بمرحله ما قبل التعليم العالي/الفني من البدايه,منذ ان يتعلم الطالب حروف الابجديه.

حقا التعليم كالماء والهواء,فأي تلوث فيه,يسبب ايضا الوفاه,وفورا.

والسلام عليكم ورحمه الله وبركاته.


4 comments:

  1. بس المشكلة ياحبي ان في النهاية هايفضل المعهد معهد والجامعة جامعة وهيه دي المشكلة الاساسية..يعني الفصل اللي انت بتتكلم عليه برضه بيكون موجود تلقائي ..هوة اكيد طبعا انت لو رفعت مستوى المعاهد ممكن الفرق ده يقل بس هايفضل موجود..
    وبعدين كمان لاحظ ان عشان احاول ان اقلل عدد الطلبة اللي داخلة الجامعة لازم في الاول اغير نظام التعليم نفسه لأني بصراحة شايف لغاية دلوقت ان نظام الثانوية العامة ده مش هوه الفيصل ومايعتبرش مقياس بأي حال من الاحوال لمستوى الطالب....فانا لو حاولت اني اقلل عدد الجامعيين بناء على المقاييس اللي موجودة دي يبقى حرام فعلا لأنك بكده بتوقع مهارات ممكن تكون لسه مش واضحة في مرحلة الثانوية دي بس تتطلع وتخرج بصورة احسن في مرحلة الدراسة الجامعية...الخلاصة انا شايف ان كلامك ممكن يكون مظبوط بس الموضوع محتاج اعادة هيكلة لنظام التعليم من جذوره ومايكونش الاختيار او الترشيح على المقاييس الحالية

    ReplyDelete
  2. بالظبط ياحبي,انا متفق معاك تماما في اللي قلته واللي هو:"الخلاصة انا شايف ان كلامك ممكن يكون مظبوط بس الموضوع محتاج اعادة هيكلة لنظام التعليم من جذوره ومايكونش الاختيار او الترشيح على المقاييس الحالية"

    وانا كاتب كده فعلا,بص كده:" واهم ما يجب ان يؤخد بحذر ان يشعر كل طالب مقبل علي الدخول اما الجامعه او المعهد بأنه فعلا يستحق ذلك وان مكانه هو الذي سيذهب اليه. وهذا يحتاج اهتمام كبير جدا بمرحله ما قبل التعليم العالي/الفني من البدايه,منذ ان يتعلم الطالب حروف الابجديه"

    فبالطبع علي النظام الحالي الموضوع فاشل فاشل فاشل,انا بفترض انه هيبقي في اعاده هيكله للتعليم من الاول" منذ ان يتعلم الطالب الحروف الابجديه" ولا النتيجه زي ما كل الناس عارفاها ومتوقعاها.

    اما ان الجامعه هتفضل جامعه والمعهد معهد,انا اقترحت اننا نقدم العلوم اللي بتخلي الجامعي متفوق عقليا علي بتاع المعهد لخريج المعهد,لاني شايف ان النظره الحاليه لخريج المعهد انه سطحي,وان الجامعي متعلم ومثقف,فانا كانت روئيتي اني اخلي خريج المعهد والجامعه بيكمل بعضهم بعض مهنيا,انما اجتماعيا متساويين. يعني زي ما في تدوينه "هل هناك علاقه بين النظري والعملي في الهندسه" وعلقت عليك وقلت اننا في الكليه بنفترض اننا بنخرج مصمم مش مهندس صيانه,خريج المعهد في الحاله دي هيبقي هو مهندس الصيانه,ويبقي خريج الجامعه مصمم,فشوف كده,خريج هندسه ميكانيكا دلوقت هيبقي هو خريج المعهد في نظري وعلي الاساس اللي كنت بقترحه.

    انا طبعا عارف اني مثالي زياده عن اللزوم,بس زي ما كتبت برده"وفي النهايه اقول للمسئولين اني اتحدث نظريا,وانتم عندكم العلم بالواقع وحال الشعب,وما انتم مقدمين عليه سيعمل اعاده تشكيل كامله للمجتمع بأكلمه,لذا وفقكم الله,خذوا حذركم وانتم تضعون هذا القرار. فرغم فائدته,الا ان الخطأ فيه قاتل". بس لو كان في تخطيط سليم ونتيجه متوقعه ومدروسه,يبقي لازم نضغط علي نفسنا"الدكتور مهاتير محمد-مؤسس النهضه الماليزيه-كان بياخد قرارات المجتمع مش بيقتنع بيها في احيان كتيره,وكان بيقدم تنازلات كتيره عشان يقدر يعمل النهضه".

    ودا كان تعليقي,ومستني ردك,وشكرا مره اخري علي اهتمامك وتعليقك,والسلام عليكم ورحمه الله وبركاته.

    ReplyDelete
  3. famlif.blogspot.com
    شكرا لك يا أخي على الموضوع

    ReplyDelete
    Replies
    1. وبارك الله فيك يا اخى. وشكرا على مرورك الكريم. ولا تنسانى من صالح دعائك

      Delete