مهرجان التنميه البشريه الثاني....التخطيط

Planning

امبارح حضرت اول محاضره في مهرجان التنميه البشريه التاني اللي عاملاه جمعيه معا نصنع الحياه وشركه ايليت. كانت اول محاضره جميله جدا وهادفه اوي وعن موضوع اهميه التخطيط او الPlanning .

والحاجات دي اللي استفادتها من المحاضره الجميله اللي قدمها الاستاذ / مروان علي, بسم الله ما شاء الله عليه, ربنا يكرمه ويباركله.
من الحاجات الجميله اللي قال عليها:

1- " اسهل طريقه للتنبؤ بالمستقبل ان تصنعه"

كلمه جميله وكبتها اول ما حسيت انها فعلا بتكلم كل واحد عايز يبقي ليه مستقبل معين, وخصوصا اني والحمد لله مجرب ده بنفسي. انا الحمد لله بحب الكمبيوتر من صغري واحب اتعلم حاجات وبرامج كتير عليه, ولما عملت كده بفضل الله حسيت بالفرق, غيري بيكسل وبيشكي الزمن ومش بيتحرك, عشان كده بدعي وبقول يارب يارب يبعد عني السلبيين ويبعدني عنهم.

انا لما افكر في مستقبل معين, هبقي عايشه وبفكر فيه وكل حركاتي وسكناتي بتخدم الهدف ده وبتوجهه, عشان كده لما الواحد يحب يبقي عايز يكون ليه مستقبل معين, لازم يفكر فيه او زي ما بيقوله يصنعه, والمستقبل في الاول والاخر في ايد ربنا سبحانه وتعالي.

2- " اكتشف مهاراتك بالورقه والقلم وفتش في نفسك"

لازم اقعد اافتش في نفسي, واعرف انا كويس في ايه ووحش في ايه, ولازم اكتب ده واوثقه واقيم نفسي باستمرار لان القلم محبس العلم.

3-" انت اللي بتحقق نجاحك, بترسم شكلك, مفيش عقبات"।

واستدل علي كده بقصه الراجل صاحب كنتاكي, راجل كان شغال حاجه كبيره اوي في الجيش الامريكي وطلع علي المعاش وهو عنده 65 سنه. 65 سنه وبيفكر ازاي يخطط لحياته مقلش انا هيأس وخلاص عمري انتهي والكلام اللي احنا بنقوله علي طول ده واللي ولا يودي ولا يجيب. الراجل شاف موهبه في نفسه انه بيعمل خلطه فراخ حلوه من 12 عشب, كل ما بيروح بالخلطه دي عند مطعم ميرضاش ياخدها منه, ميأسش, لا, دا قال خلاص انا هعمل مطعمي الخاص. وبالفعل, كنتاكي بيستخدم 12 عشب بيعملوا الخلطه, ليه مصانع, كل مصنع بيخلط عشبين بس, ومصنع في الاخر بيعمل التوليفه من الخليط ده كله ويفضل كنتاكي ليه سر خلطه الله اعلم هيتعرف امتي. كنتاكي اللي ليه فروع في كل انحاء الدنيا لا حصر لها, وصل للي وصل ليه ده بأمر ربنا طبعا, وعشان فكر وخطط وقرر. وهو عنده 65 سنه, جاتله فكره, مش زي ما بنقول, ان الافكار بتموت لما نوصل لل40. طول ما انت عايش فكر وابدع واشتغل واستغل وقتك, ربنا سبحانه وتعالي في القران قال" فاذا فرغت فأنصب" صدق الله العظيم.

4- مايك ديل, صاحب شركه ديل للكمبيوتر, وصل للي وصله دي بأمر ربنا في ظل تواجده وهو لسه عايز يبدأ وكانت شركتين Apple وIBM اكبر شركتين في العالم وقتها. ميأسش, وبفكره بسيطه وهو الTelesell , انه يبيع منتجه من خلال التليفون, اتصل وقوله عايز جهاز كذا, يجيلك. فكره بسيطه, بس شوف وصلته لحد فين.!!!........سبحان الله.

5- من الحاجات الجميله برده اللي استفادتها اني لما ابقي اكون عايز اعمل كتاب, لازم امر بتجربه شخصيه من خلالها اعمل الكتاب ده, مش اقعد كده واكتب مع نفسي وابقي كلمنجي. وسرد قصه واحده كان عندها ديون كتيييير, بس مصوتتش زي ما احنا بنعمل لما تقابلنا مشكله وفكرت فيها. كل اللي عملته انها قالت انا هوفر في مصاريفي شويه, بطلت تخرج في الاماكن الغاليه وبقت تروح المنتزهات العامه, ومبقتش تاكل من بره, وشويه حاجات.......سددت كل ديونها, وفرت, وبقي عندها ثروه كمان والفت كتاب واسمهOne Hundred Day without shopping والكتاب ده حقق اعلي نسبه مبيعات.

6- الخطه مش قيد, انا لما بعمل خطه عشان انظم حياتي واستغل وقتي صح, مش معني كده اني بحط قيود علي نفسي,لا, الخطه مرنه جدا, وفي اي وقت نتيجه اي ظرف ممكن تتغير.

7- التخطيط مهاره, بالتدريب والممارسه هتتنمي,وده شأن اي مهاره في الدنيا,لازم هاخد وقت عشان اتقنها. اول مره هعمل فيها تخطيط هتنجح بنسبه 10%, التانيه 30%, وهكذا لحد ما اوصل لدرجه اتقان التخطيط.

8- التفكير السلبي يدمر, لو فكرت في الشيء علي انه حمل يبقي مش هعمله وهتعب نفسيا ومش هنجز اي حاجه في حياتي, انما لو اخدته علي انه تحدي,هعديه.

9- لو فكرت في نفسك وفي حياتك بشكل سلبي, هبقي سلبي, ولو فكرت فيهم بشكل ايجابي, هبقي ايجابي وناجح.

10- ايه الفرق بين الحلم والهدف؟ قالك ان الحلم لما اسبغه بالحاجات دي يبقي هدف والحاجات دي تتجمل في كلمه SMART

S:Specific يعني الهدف لازم يبقي محدد
M:Measurble يعني لازم يبقي قابل للقياس, اقيس واشوف انا بقرب من الهدف ولا ببعد عنه, هيا دي القابليه للقياس.
A:Ambitios لازم يكون ليك هدف كبير وطموح
R:Realistic لازم يكون هدف واقعي, مش اني ابقي رئيس جامعه بكره.
T:Timed لازم يكون محدد بوقت.

11- اللي بيحط خطه ماديه بيبقي غني, وتعريف الغني: هو من نفقاته اقل من دخله.

12- جوانب التخطيط: العلاقات, حياتك الماديه,وظيفتك,حياتك الدينيه,شخصك.
الابحاث اثبتت ان النجاح بيعتمد بنسبه 85% علي العلاقات, و15% علي مهاراتك.
كل واحد فينا لازم يبقي ليه ميزه تنافسيه ينفرد بيها عن الاخرين.

13- ورشه عمل الاهداف:

اقعد في مكان محدش يضايقني فيه.
اكتب كل حاجه نفسي اعملها في حياتي من غير قيود في كل الجوانب اللي انا عايزها.
في خلال 5 سنين لو مت, هبقي عايز اكون حققت ايه وايه وايه, ولو مت بعد سنه, هكون عايز اكون حققت ايه, ولو مت بعد شهر...اسبوع...يوم.

الكلام ده عشان يعرفك ايه هيا اولوياتك وترتبها وتنظمها.

14-كيف تحقق اهدافك؟
حدد لك رساله في الحياه...انت عايش ليه.
ضع اهدافا تصل بك الي هذه الرساله
قسم رسالتك في الحياه الي اهداف مرحليه( 3 سنين,5سنين,....).
ضع اهدافا شهريه,اسبوعيه,يوميه.

15- اجمل ما قيل: هدفي, اسعاد الاخرين بتحقيق اهدافي.
ازاي ابقي صاحب شركه وبشغل ناس وهما سعدا ونفسهم الشركه تكبر وتكسب اكتر مني, ازاي ابقي عايز ابقي حاجه كبيره والناس اللي بستخدمها لتحقيق الحلم ده تبقي من قلبها نفسها تحقق هدفي اكتر منا احققه. احساس جميل.


16- اهم 15 دقيقه في يومك, هما اخر 15 دقيقه في نهايه اليوم قبل ما تنام, لانك بتخطط فيها لليوم الجاي عايز تعمل فيه ايه.

17- خطوات التخطيط الاستراتيجي: خطط,نفذ,قيم,عدل,اعد التنفيذ.

18- الهدف من التخطيط هو خلق جو من الاستقرار لتقليل المفاجات واثارها علي النظام.

وفي الاخر,ركز في الملاحظات دي:

1- الحظ هو ان تكون جاهزا حين يحين الوقت.
2- اعلم انك ان لم تخطط للنجاح, فانك تخطط للفشل.
3- لازم تعرف (بتشديد الراء)الناس انهم جهله, وانك اجهل منهم.
4- 75% من الامراض العضويه سببها نفسي.
5- قيادتك للعالم تبدأ من قيادتك لافكارك.

وفي النهايه, الراجل كتر الف خيره كتبلنا ايميله وموقعه الشخصي عشان نتواصل معاه وهما كالاتي:
http://www.marwan-ali.com/
nedaamisr@yahoo.com

وانا كده خلصت المحاضره دي, ربنا ينفعني بيها وينفعكوا بيها برده,ومتنسونيش من الدعاء, والسلام عليكم ورحمه الله وبركاته.