مهرجان التنميه البشريه الثاني......اجتياز المقابله الشخصيه

بسم الله الرحمن الرحيم

رابع يوم في المهرجان,قبل ما انزل قريت الجدول ياتري هناخد ايه النهارده وعرفت اننا هناخد حاجه عن اداره المشاريع الصغيره وبعديها حجه عن الانترفيو........ماشي خير,ربنا ينفعنا باللي هنسمعه ان شاء الله.

حضرت موضوع المشاريع الصغيره وكالعاده بتسمع تقديم بتحس انك هتشوف واحد مقبور,تلاقيه واحد لسه كتكوت صغنون......ماشاء الله بتاعنا ده كان استشاري مشاريع صغيره في الجامعه الامريكيه ومش عارف يه في الاممم المتحده.....حوارات يعني ربنا يزيده ويباركله.

حاولت اسجل وراه الحاجات,بس لقيتها انها حاجات ممكن تتقري بس لما ناخد الماده العلميه في اخر المهرجان ومش هحتاجها دلوقت,فقلت خلاص انفض,مش هكتبها في المدونه.

جينا بقي لموضوع ازاي تعدي الانترفيو....قدمهولنا محمد محمود برده,فرحنا,بس لاني والحمد لله عندي خلفيه كويسه وكمان اجتزت مرحله الانترفيو دي قبل كده وشفت زمايلي بيمتحنوا ازاي.....محستش ان الموضوع كان بنفس القوه لما كان بيتكلم عن الثقه بالنفس....بس برده كتبت وراه كام حاجه كده كانوا جداد عليا وحبيت اسجلهم هنا.

اتكلمنا عن الحاجات المهمه والاساسيه اللي بتبقي مطلوبه في الخريج وكانت الاتي:

1- لابد ان يكون متزن(بمعني انه يكون موزون في حياته,علاقاته,علمه,مش اوفر ولا قوي في حاجه علي حساب حاجه)

وقالنا قصه جميله كده,كان في واحد بيعمل مقابله(انترفيو) علي الغدا(ودا نوع هنتكلم عنه ان شاء الله) والراجل اللي هيمتحن ده طلب بيض....بعد ما كل وانسجم واتكلموا لقي نفسه مرفوض........ليه بقي؟

-لانه حط ملح علي البيض قبل ما يدوقه حتي.....طبعا الراجل اللي عازمه(المدير مثلا) مش عايز يغديه ولا حاجه,انما هو عايز يلاحظ عليه حاجه زي كده.........مع الدردشه والملاحظات اللي بيعملها في الاكل زي حركه الملح ده بيقدر يكون فكره عن شخصيته ويلاقي اجابات لحاجات عايز يعرفها فيه..........فحركه البيض دي اوحتله انه بيستعجل في قراراته ومعندوش حكم سليم علي المواقف.....بعد كده ابقي كل البيض عادم ويستحسن لما حد يعزمك تقوله لا شبعان الحمد لله....!!!!!!! انا بهزر ياعمنا,ههههههههه.

2- لازم يكون مرن(و زي ما قلت امبارح,مرن مش لين.......مرن يعني بتكيف مع الامور,ابقي عامل زي عود الزرع لما تيجي ريح تتنيه مش تكسره.........مع الحفاظ علي الثوابت اللي لا اتنازل عنها.......علي سبيل المثال,انا مثلا واحده بنت مسلمه محجبه ورايحه مكان اشتغل فيه بس ليه شرط انه ابقي بشعري,انا من ثوابتي ان حجابي ده فرض,يبقي خلاص مرفوض,دا مش معناه تجمد او اقلع الحجاب عشان ابقي مرنه,لا,انما دي ثوابت,ولازم اعرف اللي ادامي شخصيتي وايه حدوده معايا في التعامل عشان مبقاش عبد ليه,ويعرف انه لو عايز يشغلني يشغلني وهو عارف اني كذا وكذا من ميزات او عيب,عاجبه خير,مش عاجبه.........ربنا هو الرازق,مش صاحب الشركه والرسول عليه الصلاه والسلام قال"من ترك شيئا لله,ابدله الله خيرا منه"صدق رسول الله صلي الله عليه وسلم.)

-برده كانت في بنت رايحه تقدم في شركه والمدير قابلها,البنت دي مش بتسلم علي رجاله....المهم المدير مادد ايده عشان تسلم قالتله اسفه,مش بسلم علي رجاله,قالها عيب يابنتي,انا زي والدك ومديرك ومتكسفينيش,قالتله اسفه والله دا مبدأ عندي,مش بسلم علي رجاله,وفضل مادد ايده وفضلت ثابته علي رايها,عينها علي طول....عارفين ليه؟؟!!!!!!!!!...........لانها في الاول طبعا اطاعت ربنا وربنا مش بيتخلي عن عبده المؤمن المتوكل عليه,ثانيا,انه من الموقف ده شاف فيها قوه الشخصيه والثبات المطلوبين للشغلانه دي.......يبقي انا اتوكل علي الله ومتنازلش عن مبادئي وابقي متيقن ان ربنا هو الرازق..........وربنا هيكتبلي الخير في المكان اللي انجح فيه واوصل لاعلي درجه في الدنيا والاخره.

3- له القدره علي التعلم......وده بقي شيء اساسي مطلوب في كل مكان دلوقت وفي اي حاجه...انك تكون عايز تتعلم,وياسلام لو بتعرف تعلم نفسك بنفسك.........اول حاجه هتسمعها لما تروح تشتغل في مكان"انسي كل اللي اتعلمته في الكليه,احنا هنا هنعلمك وهندربك من اول وجديد"....بس عشان ده يحصل,لازم يشوف فيه وتكون بالفعل موجوده فيك......القابليه للتعلم.

4- عنده مهارات اتصال.........ازاي اعرف اتعامل مع مختلف الناس,الكويس والوحش,العبقري واللي ملكاته الذهنيه علي اده.....الحرفي والمهندس......طبقات الناس المختلفه.

نيجي بقي لنقطه تانيه وهي,انواع الانترفيو:

1- مقابله الفرز..........الراجل يقابلك عشان يشوف فيك حاجات معينه بس وينقيك من الاعداد الكبيره اللي بيختارها من السي في....ووصولك للمرحله دي كويس جدا,لانه معناه ان السي في بتاعتك فعاله وبتتقبل.

2- مقابله مع مجموعه اشخاص(لجنه لمقابله الشخصيه): هنا بقي انت بتقابل ناس كتير,ممكن يكونوا مديرين الشركه المختلفين,او كذا واحد كل واحد فيهم متخصص في حاجه معينه وعايز يشوف من خلال مقابلته معاك انت تنفع في ايه......يعني مثلا انت مهندس والشركه عايزه مهندسين جداد ليها بس مش كاتبين تخصص معين.........اللجنه دي ممكن يبقي فيها مدير مشروعات,مدير تسويق,مدير فني......وكلهم يسألوك,وكل واحد فيهك يقيمك ويشوف انسب مجال ممكن تنفع فيه..............اووووووووووووو, ان الراجل المدير الكبير او صاحب الليله اللي عايز يعينك في المكان الفلاني(اللي انت رايح عشانه) عايز يستفيد بخبراتهم في تكوين رأي عنه.

- مهم جدا مهارات الاتصال في النقطه دي,انت هنا مش بتكلم واحد,انت بتكلم مجموعه,لازم كل الناس تحس انك بتكلمهم كلهم مش واحد بس,لازم تحافظ علي لغتك الجسديه وانفعالاتك المؤكده لكلامك,نظرك يبقي ليهم كلهم,صوتك يبقي واضح.........ولما حد معين منهم يسألك سوال,اللي سألك اديله نسبه اهتمام 50%,ووزع ال50% الباقيين علي باقي الناس الموجوده.

3- سلسله من المقابلات: هنا بتطلع من انترفيو,تخش انترفيو.......امتحنك واحد فلان مثلا في الHR, بعدها يقولك اتفضل روح لفلان تاني وهيمتحنك مثلا في فنيات شغلك,وهكذا.

نصيحه: لما تواجه ان شاء الله النوع ده,اطلب 5 دقايق راحه من كل انترفيو والتاني عشان تراجع فيهم نفسك,تشوف عملت ايه في الانترفيو الاولاني وايه الكلام الصح اللي قلته وكان كويس,وايه الحاجات الغلط العفويه اللي وقعت مني لو اتسألت في الموضوع ده تاني مقولهاش,وكده.

4- المقابله عبر الهاتف: هتلاقي واحد بيتصل بيك وبيسألك شويه اسأله,ممكن يكون زي مقابله الفرز الاولانيه بس دي بالتليفون,اريحلك.

5- مقابله مجموعه المتقدمين للوظيفه معا: ودي غالبا بتبقي في شغل الصحافه والاعلام, الناس اللي مقدمه علي الوظيفه كلهم وبعد ما يعدوا كام مستوي من المقابلات......بيجمعوهم كلهم.....لو مثلا مقدمين علي وظيفه محللين سياسين في جريده جديده,يطرح المدير موضوع سياسي ويقول ايه رايكم فيه.....ويبدأ يسمع بقي ويشوف ومن اللي بيسمعه ويشوفه يقدر يقيم ويلاحظ من الكويس ومين الوحش.

- في النوع ده حافظ علي مظهر كويس(والانواع التانيه كده طبعا) وصوت واضح,واقعد في مكان متوسط مريح ليك.

6- مقابله الفيديو: ودي متقالتش بس انا عارفها,في الشركات المالتي ناشونال,وخصوصا اللي بتكون عايزه ناس تتبناها عالميا وترعاها لان دول هما اللي هيكونوا كوادر الشركه الجايه....بيعملولك ما يسمي بافيديو كونفرنس.......بتقعد في قاعد فيها شاشه كبيره جدا,وبتلاقي الشاشه دي مثلا فيها ناس اجانب من كل انحاء العالم,او كذا شاشه كل شاشه فيها واحد......ويقعدوا بقي يسألوك.

-طبعا النوع ده تحدي كبير للثقه بالنفس,بس مادام انت وصلت للمرحله دي تبقي ادها ان شاء الله,خليك واثق في نفسك وثق بالله قبلها زي ما قلتلك,واتوكل علي الله,واهدي ومتتوترش,هما مش هياكلوك,هما بس عايزين يشوفوا ثقتك في نفسك,استعداتك العلميه,هل انت فعلا موهل للوصول للمرحله دي من الانترفيو وهكذا.

7- المقابله علي مائده الغداء: وده اتكلمت عنه ضمنيا في نوع تاني واديت عليه مثال كمان.

لما اروح الانترفيو بقي,المفروض اكون عملت ايه قبلها:

1- تكون عارف تاريخ الشركه دي كويس جدا,نوعها(مساهمه,خاصه,حكوميه,.........).

2- لازم تكون رايح وانت عارف طبعا الوظيفه اللي انت مقدم عليها,مش حد قالك في وظيفه,قدم,رحت مقدم واتقبلت كمان وكل ده انت متعرفش رايح لأيه.

3- المنتجات والخدمات اللي بيقدموها......نسبتهم اد ايه في السوق......سمعتهم.

4- الفئه اللي بيتعاملوا معاها........هل مع الطبقه المتوسطه,الناس الهاي كلاس بس؟!!!

5- المنافسون, وممكن تتسأل انت ليه فضلت الشركه دي عن الشركات التانيه(المنافسه طبعا).

كلام من عندي:

الانترفيو ده هو اول خطوه في سلمك الوظيفه....نصيحتي,نمي نفسك علي اد ما تقدر,بس متقولش غير اللي في نفسك وبيوصفك بس...متقولش علي نفسك طموح وبقدر اشتغل تحت ضغط وانت مش كده......انت اه ممكن تترفض في الانترفيو عشان دول مش موجودين فيك,بس اانا قلتلك قبلها نمي نفسك...واعتقد انك تطلع من انترفيو احسنلك كتير واحسن لمنظرك ادام الناس كمان لما يطلب منك شغل تستخدم فيه المهارات اللي زعمت انها موجوده في نفسك,وتمشي من المكان ده بعد شهر مثلا...............!!!!!!!!

واخيرا,اتمني اكون قدمت موضوع يفيدكم,والسلام عليكم ورحمه الله وبركاته.