مهرجان التنميه البشريه الثاني....اداره الوقت

Time Management

تاني يوم جه, النهارده الموضوع كان عن الTime Management. اخدنا شويه كلام جميل اللي دونته لنفسي كان الاتي:

1- ان ما تفكر فيه معظم الوقت هو ما تصبح عليه.
وبصراحه, انا مقدرش انسي اازاي كنت بتخيل وبفكر اني ماشي با اللابتوب بتاعي وبعمل شغل هنا وهنا, وربنا اراد واتحقق. منساش ازاي تخيلت الناس وهيا بتصقفلي علي انجازي لمهمه معينه ولقيت ده فعلا....حقيقه, اللي بتفكر فيه, هو اللي بتومن بيه, هو اللي بتوصله في الاخر بأذن الله, ومهما كانت التحديات.


2- علي عكس ما كنت بكدب نفسي, طلع فعلا مينفعش اسمع موسيقي او اغاني او او وانا بذاكر او بشتغل, كده انا مش بركز بنفس الكفاءه اللي كان ممكن اشتغل بيها وانا مركز ومش مشغل حاجه.

3- من اسباب تضييع الوقت, عدم القدره علي قول( لأ) . ودي فعلا حقيقه, كل ما حد يتصل عايزك تعملي كذا وابقي انا مشغول اتكسف منه واقوله ماشي, وهو يعطلي وقتي علي الفاضي...ما تيجي نخرج, وابقي مشغول, بس مقولش لا.....................لازم اتعود اقول لأ.


4- في حديث بيقول" نعمتان مغبون فيهما كثير من الناس: الصحه والفراغ".........الفراغ نعمه, استغله صح.

5- الفرصه لما بتيجي لحد مش بتستناه.....وانت لما يبقي عندك وقت انك تاخد فيه دوره زي كده,دي فرصه,متفوتهاش......لما تبقي في قطر 5 ساعات,دي فرصه تقرا فيها في حاجه بره مجال تخصصك وتوسع مداركك,متفوتهاش.

6- مادام الفرصه جتلك, فربنا سبحانه وتعالي اعلم بيك منك,فمتقللش من قدراتك وخش عليها بقلب جامد, هتلاقي ربنا وفقك لانه سبحانه من الاول عارف انك تقدر تنجز الموضوع ده, وفي الاخر الناس هتلاقيها بتقول عنك دي واد جامد,دي اسطوره, دا كذا, دا كذا...وانت اصلا معملتش اي حاجه غير انك استجبت لقدر ربنا واشتغلت وقويت ثقتك بنفسك ونجحت.


7- سئل(بضم السين) المستحيل اين تعيش,قال اعيش في عقل العاجز.

8- No pain, No gain.

9- اشتري MP3 وحمل عليه دروس ومحاضرات استمع ليها وانت رايح شغلك, وانت بتاكل, وانت بتجري, وانت عند الدكتور او وانت مستني اي حاجه...........استغل وقتك.


10- تمرين للتحكم في ضياع الوقت: اعمل جدول واكتب فيه الحاجات الشخصيه والخارجيه اللي بتخليك تضيع وقتك, ميزه التمرين ده انه بيخليك تعرف المشكله فين,ومادام عرفت المشكله, يبقي عرفت الحل.

11- كل الناس مختلفه, ومش كل الناس مرت بنفس الظروف, عشان كده لما تتعامل مع الواحد راعي دي فيه,وان مش العلاج اللي نفع معاك هينفع معاه, او الاسلوب اللي انت اتبعته ونجح معاك لازم ينجح معاه.


12- خلي الناس تحترمك وتحترم مواعيدك ونظامك,فانت متخفش من الناس وعرفهم نظامك, وصاحبك هو اللي بيحبك ويحبلك الخير,فمش هتقوله انا عايز اعمل كذا مفيد مش هينفع اخرج يقوم يزعل,ده مش صاحب,ده لاهي, وانا مضيعش وقتي مع لهاه.

13- تقسيم الوقت: في حاجه اسمها وقت الذروه, الوقت ده اللي بيكون عندك فيه اكبر طاقه ونشاط في اليوم. فأفضل وقت تنجز فيه اعمالك بكفاءه هو وقت الذروه, اللي مش شرط يكون في الصبح بدري او الليل متأخر....كل واحد وليه وقت الذروه الخاصه بيه.


14- عشان تغير ميعاد نومك او صحيانك,زوده او نقصه بمقدار 10 دقايق كل يوم مثلا, فبكده انت مش هتحس بالتغيير او الالم الناتج عنه.....وعامه في حياتك لما تحب تحقق هدف, شوف انت فين وعايز توصل لفين, وقسم المسافه دي علي مراحل, وشوف كل مرحله عايزه منك ايه, هتلاقي نفسك في الاخر حققت هدفك.

15- تنظيم العمل: قسم اعمالك اليوميه للاتي وترتيبهم ده تبعا لاهميتهم واوليتهم في التنفيذ: مهم وعاجل, مهم وغير عاجل, غير مهم وعاجل, غير مهم وغير عاجل.


16- لازم تعمل لنفسك Excel sheet بالمهام اليوميه بتاعك,متسبهاش بالبركه,اجبر نفسك علي جدول....وافتكر ان مروان علي قبل كده نجح في انترفيو بفضل الله ثم بفضل الحكايه دي, لما ساله الراجل انت بتعمل تخطيط,قاله ايه, وراح فتحله اللاب توب بتاعه ووراله تخطيط اخر رحله ليه علي Excel sheet. وخلي المهام المتشابهه ليك بلون واحد, عشان تعرف بسهوله انت وراك ايه وليه مساحه زمنيه اد ايه.


17- قلل 5 دقايق من نومك كل يوم ولمده اسبوع, هتلاقي نفسك في اسبوعين استغليت ساعه من وقتك كانت بتروح منك, وهتستفاد ب 3 سنين من عمرك.


18- لابد ان تكافيء نفسك,والطريقه دي جميله اوي وبتحفز وتحمس اوي, الناس مش هتقدرني في كل حاجه انا بعملها, انما انا لازم اقدر نفسي. ابراهيم الفقي لما اشتغل في الفنادق اشتغل يغسل صحون, ولما وصل لمدير الفندق, بعت لنفسه بوكيه ورد. انا ان شاء الله هعمل لنفسي شهادات تقدير اكرم فيها نفسي واطبعها احسن طباعه وبأذن الله هحقق كل اللي بحلم بيه.

19- حبر ضعيف, خير من ذاكره قويه. لازم تكتب كل حاجه بتفكر فيها, تكتب افكارك المتدفقه,خواطرك, مهماتك, مهما كانت ذاكرتك قويه هتنسي.



20- خلي دايما معاك في جيبك مفكره,وسميها مفكره النجاح.



21- علم الناس انها تحترم مواعيدك معاك, لو الناس شافت انك لا تتهاون بالوقت,كلهم هيعملولك الف حساب.



22- اذا اردت الا تتعب,فاتعب حتي لا تتعب.


23- لا تسلمن غيرك ذمامك,فيصبح من كان وراءك امامك,مثل ذلك لا يكفيه انكسارك,بل يبني نفسه من حطامك.

24- قصه جميله اختم بيها اسمها قصه الحطاب, الراجل ده حطاب وبيكسر في الشجر بس الفاس اللي معاه تلمه, تقوله ياعم سن الفاس بتاعك,يقولك معنديش وقت.......!!!!!!

مش لو كان سن الفاس بتاعه كان زمانه خلص كل الشجر اللي عايز يكسره وبجهد اقل كمان...............التخطيط مش بيضيع الوقت,التخطيط بيحافظ عليه, والسلام عليكم ورحمه الله وبركاته.