مهرجان التنميه البشريه الثاني...الاسعافات الاوليه

الاسعافات الاوليه

الموضوع ده موضوع مهم جدا...........الاسعافات الاوليه.....ازاي لاقدر الله لو واحد حصلتله حادثه ادامك,حريق,اي مشكله تتعامل معاه بسرعه.

بس الاول لازم نعرف يعني ايه اسعافات اوليه؟

اسعافات اوليه يعني الحاجات السريعه اللي انت بتعملها للمصاب عشان تجهزه للمستشفي...انت مش بتشفيه ولا بتديله علاج,انت بس بتعمل بعض الحاجات اللي تحافظ عليه والمهمه والضروريه وقت حدوث الحادثه عشان لما يروح المستشفي يبقي جاهز للعلاج والشفاء ان شاء الله من غير ما تكون الفتره اللي اخدها عشان يروح من مكان الاصابه للمستشفي تسببت ليه في اي مضاعفات.

الحوادث العامه اللي بنعمل ليها اسعافات اوليه هيا: الازمات القلبيه,الحريق,حوادث الطرق.

نبدأ بحوادث الطرق.......طبيعي لما تحصل حادثه(لاقدر الله) بيكون المصاب اللي ادامنا متعرض لحاجه معروفه من الحاجات دي:

كسر-نزيف-اغماءه ومش بيتحرك

نتصرف مع دول ازاي بقي؟

• اولا وقبل كل شيء, لازم نتاكد ان مخارج ومداخل التنفس للمصاب كويسه,عشان نضمن ليه التهويه,واان كنت شاكك ان في حاجه دخلت فمه وممكن تعيق تنفسه,انيم المصاب بحيث اني اخلي وشه ناحيه الارض عشان ينزل اي حاجه موجوده فيه ويبقي التنفس والتهويه معاه كويسه.

• ثانيا,اسيب المصاب ياخد الوضع اللي يرتاح عليه,مجبروش علي وضع معين او اقعده القعده الفلانيه وهو مش عايز..ممكن يكون عنده كسر في عظم او حاجه لاقدر الله,الحركه اللي خليته عليها دي تزودله المشاكل بتاعته...مادام المصاب قاوم الوضعيه اللي انت حطيته عليها يبقي مش مرتاح فيها.

• لما نحب نشيل المصاب,لازم نخليه مستوي ومفرود,كل حاجه في جسمه مفروده,ايديه,رجليه,ضهره..........عشان كده لما تيجي الناس تشيله,يفضل اربعه يشيلوه....واحد ناحيه راسه,واحد رجله,واحد ضهره,واحد المقعده. لأن لو 2 بس شالوه من ايده ورجله مثلا وكان لاقدر الله عنده شرخ في العمود الفقري,الشيله دي هتقوس جسمه وتخلي الشرخ ده كسر.فلازم يتشال بالكيفيه دي.

• لو شفنا ان في حرج ينزف,الاعتقاد الخاطيء بتاعنا اننا منغطيهوش لحسن يكون الحاجه اللي بنغطيه بيها دي مش نضيفه وممكن تلوث الجرح اعتقاد خاطيء...لو الجرح اتلوث دي مش مشكله,ببساطه في المستشفي بيظبطوها...انما لازم نغطي الجرح عشان نوقف النزيف. ولما اغطيه,فعلا صحيح اني اغطيه ب بن او رماد,الحاجات دي بتوقف النزيف والرماد ده كمان بيكون تراب محروق,فا النار بتكون معقماه.

• في وسيله اسمها الAirway,الاداه دي علي شكل حرف C, بندخلها في فم المريض عشان يبقي التنفس بتاعه مضمون وصحي.

• لو المريض عرف ينام علي ضهره,معني كده انه معندوش مشاكل في العمود الفقري.

الحريــــــــــــــــــــــــــــــــــــــــــــــــــــــــــق:

الحريق(والعياذ بالله) من الاصابات الشديده جدا والخطيره عشان كده التصرف فيها لينا بيبقي محدود ولازم نودي المصيب بسرعه لمركز علاج حروق عشان يقدر يتصرف معاه بسرعه.

الحروق بتتقاس بحاجه اسمها شده الحريق, يعني بقول الحريق في جسم المصاب نسبته%, مثلا الظهر لو اتحرق دا نسبته 18%. فكل ما زادت نسبه الحريق كل ما زادت خطورته.......طب نعرف ازاي الحريق اللي في جسم المصاب نسبته وخطورته اد ايه؟

قالك ان ايد المصاب بتمثل ب1% من جسمه,فانت كده تقدر تعرف نسبه اد ايه في جسمه مصابه.

عند الحريق نتصرف ازاي؟

اول حاجه نعملها نبعده عن مصدر النار,ونطفيها فيه لو كانت في حاجه مولعه واحافظ علي نظافه الجرح.........الاعتقاد الشائع اني احط ميه ساقعه علي الحريق دا مصيبه...لان ده ممكن يتسبب في هبوط حاد في درجه حراره الجسم وتعمله مشاكل لاقدر الله,انما نحط عليها ميه من الحنفيه,وبعد كده نوديه لمركز علاج الحروق علي طول.

الازمــــــــــــــات القلبيـــــــــــــــــــه:

لو شفت واحد مضطرب وممكن يترعش ويتنفض كمان ومش عارف ياخد نفسه....ممكن كده بيكون بيمر بأزمه قلبيه............هلاقيه مخنوق وعنده ضيق تنفس,لازم اضمن ليه التهويه السليمه.

استشــــــــــــــــارات عــــــــــــــامه:

• لو حصل اي كسر في العظم مش هقدر احرك العضو ده خالص,يعني لاقدر الله لو حد حصله شرخ في صابعه,مستحيل هيقدر يحرك صابعه,فلازم اوديه للدكتور بسرعه.

• لو حصل ولقيت واحد دراعه اتكسر(يعني ممكن الاقي زاويه تاني دراعه ممكن يتني عندها غير الكوع) خطر جدا اني افرد دراعه,لازم اسيب دراعه زي ماهو كده,والا لو فردته ممكن ادخله في صدمه عصبيه.

• نزيف الانف لو حصل لواحد يضغط علي انفه عشان يوقف النزيف..وفي امبول ادرينالين لما بحطه علي قطنه واسد بيها الانف,بيقف النزيف بفضل الله.

• نوبه السكر بتكون اما هبوط او علو في السكر ولكن 98% من الحالات بتكون هبوط في نسبه السكر..........افضل حل اني ادي للمريض حاجه سكريه(سكر,حاجه حلوه,.............) بس تقريبا لازم يكون فاق قبلها,بعد ما يكون فاق من النوبه ابدأ اديله السكريات دي.(اتاكد من المعلومه دي,اديني بقولك اهو,انا مش فاكر هل ده صح ولا غلط,اللهم بلغت,اللهم فأشهد).

• في حالات الاغماء,ارفع رجل المغمي عليه لفوق بزاويه كبيره ممكن توصل ل 70 درجه عشان الدم ينزل من رجله لقلبه ويتضخ للمخ مره تاني.

• مفيش حاجه اسمها بلع لسانه,الفكره ان اللسان وراه غدد بتطلع افرازات للكلام والاكل والحاجات دي,فلما بتحصل للواحد ازمه عصبيه,مبيعرفش يتحكم في الافرازات دي فبتتبلع وفتسد مجري التنفس(تقريبا كده زي ما فهمت) وبيموت. انما اللسان مش بيتحرك من مكانه,دا عباره عن مجموعه عضلات.

والسلام عليكم ورحمه الله وبركاته.