Tuesday, November 4, 2008

مهرجان التنميه البشريه الثاني.......الثقه بالنفس

الثقة بالنفس
بسم الله الرحمن الرحيم
النهارده كان اليوم التالت, بعد ما سمعت تقديم كبير اوي عن المحاضر ) محمد محمود( وماشاء الله ,حاسس اني بسمع حاجات عن واحد لما اشوفه هلاقيه عقبال ما يوصل للستيج يكون لفظ انفاسه الاخيره...اتصدمت بس قلت ( ما شاء الله) لما شفته. كتكوت صغنن ميطلعش 22 سنه وكل ده. وليه دقن خفيفه كده وجميله ومبتسم وحبيناه كلنا من قبل ما يتكلم....وشكله متدين وماشاء الله عليه...ربنا يباركله.
الموضوع اللي كان بيتكلم عنه هو الثقه بالنفس...وبدأ كلامه ان مفيش حاجه اسمها ثقه بالنفس,لان النفس متقلبه يوم عاليه ويوم واطيه, انما الثقه هيا الثقه بالله,فضلا عن ان الثقه اللي عندنا دي ثقه موقف,بمعني اني انا واثق في قدراتي في موضوع معين مثلا,في التدريس,في الرياضه,في الالقاء ادام الناس, في ذكائي....انما الثقه في الحياه بعمومها ومختلف جوانبها هيا دي اللي المفروض الواحد يدور عليها ويحاول يوصلها. عشان كده بنقول مفيش حاجه اسمها الثقه بالنفس...انت تاخد بالاسباب وتتوكل علي الله وربنا هو الموفق والكريم....ونعم بالله.
برده لما بدأ كلامه قال كلام جميل جدا واول مره اسمعه. قال ميغركوش كل الكلام اللي سمعتوه عني في الاول ده..وقالنا ان الشركات العالميه بتعتبر الشهادات رقم 14 في اولويتها...اخر حاجه بيبصوا عليها هو موضوع الشهادات ده, مش زي ما احنا بنبقي فرحانين وعايزين ناخد كورس في حاجه عشان ااخد بيها شهاده, واجي شهرين انسي كل اللي اتعلمته في الدوره دي.

  • اتكلم بعد كده عن خصائص الثقه وقال ان خصائص الثقه الاتي:
1- اساس اي عمل وكل نجاح.
2- غير ثابته(زي ما قلت, بمعني انك تكون واثق في الله,مش واثق في نفسك المتقلبه).
3- تنبع من الداخل اولا.
4- معديه(يعني عدوه, يعني لما ابقي علي طول ملازم ناس واثقين في نفسهم, كاني هتعدي منهم وبرده ابقي واثق من نفسي....زيها زي الضحك,البكاء,المشاعر وكده).
5- تكتسب....يعني اقدر انميها واكبرها.

  • بعد كده اتكلمنا عن العوامل اللي بتخفض ثقتنا في نفسنا واحيانا بتعدمها وكانت الاتي:
1- الخوف من المجهول.
2- الخوف من الجديد.


3- الاعتماد علي الجانب العاطفي....وشرح هنا قصه واحد صاحبه في صيدله,كان مطبق ومش نايم بقاله يومين عشان بيذاكر لماده عنده فيها امتحان. لما راح الامتحان لقي نفسه تعبان اوي ومش هيعرف يحل حاجه,قام نام في اللجنه,وصحي بعد ساعه,متخضـــــــــــــــــــــــــــــش,نزل غسل وشه وروق نفسه وضاعت منه كده ساعه ونص,متخضــــــــــــــــــــــــش,حل الامتحان في ساعه ونص وبفضل الله,جاب امتيـــــــــــــــــــــــــــــــــاز.
4- عدم وجود هدف/نيه للعمل..............عشان كده اي عمل اعمله,سكشن ادخله,كلام هقوله....لازم اجدد نيتي فيه,لازم استحضر النيه واذكر نفسي اني بعمل العمل ده لله,عشان يهون ادامي اي صعب وتحدي لازم اجدد نيتي وافتكر ان الوقت ده انا بشتغله عشان ربنا,وكل ما زادت صعوبته,كل ما زاد ثوابي في الدنيا والاخره....انما لو شغال من غير نيه صادقه,مش هعمل حاجه!!!!....................مادام في هدف كبير ادامي هنجح ان شاء الله, وافتكر كده مين من الناس اللي نجحت كان مشوارها سهل....طول ما انت بتتعب,طول ما انت بتاخد خبره,وكل الناس الناجحه نجحت عشان الخبره اللي عندها....تقدر تقولي هتجيب الخبره منين بقي وانت مرتاح ومكسل ومش بتتحرك؟
لازم تتعب وتشتغل.....صاحب مصنع تيوتا,ساب دراسته ودرس في العربيات وعمل اول مصنع,جت الحرب العاليمه هدته,بناه تاني,اتهد تاني,بناه تالت...دلوقت تيوتا اكبر مصنع سيارات في العالم.....صاحب كنتاكي,بل جيتس اللي ساب جامعه هارفارد اعلي جامعه في العالم عشان مش عايز يدرس الرياضه اللي اهله عايزينه يدرسها....حب يدرس تخصص يبقي هو المتميز فيه(وهو ده النجاح,ازاي مبقاش زي اي واحد,ازاي اتخصص,فالمفروض ااخد بالي من دي واختار نقطه بحث انه مع الزمن ابقي خبير في النقطه دي, انما لو اشتغلت في اي حاجه عاديه,هبقي عادي زيي زي اي واحد,وزي ما اتعلمنا من المره اللي فاتت,لازم يكون ليا ميزه تنافسيه).




  • بعد كده اتنقلنا لنقطه بتتكلم عن مظاهر الثقه عند ناس كتير عباره عن ايه,قدرنا نلخصهم في النقط دي:

1-
تجارب ناجحه( زي ما بشوف الناس بتعمل بقلدها,عملوا مركز كمبيوتر ونجح,بعمل زيه وبفتكر كده اني واثق في نفسي وهنجح)

2- الادوات والوسائل المستخدمه(ببني ثقتي بنفسي علي ادوات ووسائل....انا كده واثق بالادوات,مش واثق في الله,يعني لما الاداه دي تروح خلاص هبقي عاجز....كل الناجحين كانت امكانياتهم علي ادهم وابدعوا.....وخلي بالك وافتكر...الفكره هيا اللي بتجيب فلوس,مش الفلوس هيا اللي بتجيب الفكره)
3- المظهر الخارجي(لو مكنتش عامل شعري جل,مقدرش انزل الشارع واواجه الناس مثلا)............وحكي هنا قصه جميله جدا عن محاضر اسمه الدكتور مراد الكلابي تقريبا,الراجل ده محاضر تنميه بشريه,كان رايح يدي محاضره ادام الاااااااااف, وقبل ما يخش المحاضره, الراجل منظم الامسيه حب يشربه حاجه,لما جتله القهوه اللي طلبها,اندلقت عليه وفي مكان مش ظريييييييييييف خااااااالص......اكيد فهمتوا!!!........المهم,في ناس كبيره وصغيره,رجاله وستااااااات وبنااااااات هيبقوا قاعدين.طب يطلع ادامهم كده ازاي؟!!!!. الراجل كان ليه هدف ونيه انه عايز يعمل الحاجه دي لربنا(نحسبه علي ذلك,ولا نذكي علي الله احدا) ومينفعش يلغيها, طلع وقال للجمهور انا حصلي كذا وكذا,تقبلوني كده ولا تحبوا الغيها,قالوا لا طبعا كمل.........وادي المحاضره.
4- تحفيز الاخرين وتشجيعهم( اني ببقي واثق في نفسي بس لما الناس هيا اللي تشجعني وتحركني,غير كده لا).
5- بعض الماكولات والمشروبات( انا معرفش اذاكر غير لما اشرب كبايه الشاي,معرفش ابقي واثق من نفسي غير لما اكون شربت لمون قبلها عشان يروقلي اعصابي,وهكذا).


  • اتكلمنا برده عن اللي سماها شجره الثقه, وقالنا شجره الثق تسقي ب(دمعات):
د: دعاء.....وقالنا ان الامام احمد ابن حنبل قال عشان دعائك يكون مستجاب,تخيل نفسك راجل كان في سفينه في البحر,وجت عواصف وكسرت السفينه وانت خلاص هتغرق ومتعلق بلوح خشب وبتدعي ربنا انه ينجيك.
م:مشوره.
ع:علم.
ت:تخطيط(معرفه نطاق القوه,نقاط الضعف,اهدافي......).
ا:اعتبار مشاكل الثقه.
بعد كده بقي كان شويه كلام عام....جه فيه انه لازم تكون ارضيتك اللي انت واقف عليها هو الثقه بالله,وحكالنا ان ديل كارنجي,صاحب كتب التنميه البشريه الاكثر مبيعا في العالم,مات منتحــــــــــــــــــــــــــــــــــر.....سبحان الله,كان بق,معندوش ارضيه يقف عليها,كلمنجي بس.
عرفنا برده ان الثقه بالله مرتبه اعلي من التوكل....وحكالنا عن ازاي سيدنا خالد ابن الوليد في غزوه مؤته حارب ب 3000 واحد بس ادام 200000واحد,وازاي عمل خطه انسحاب(زي ما بيسميها الغرب) بتدرس في الجامعات الغربيه.
وشفنا فيديو, واحد ومعاه واحده وناس ضايقتهم,شكلهم كده كانوا بيعاكسوا البنت اللي معاه........الواد كل اللي عمله انه راح قلدلك شويه حركات جت لي,العيال التانيه خافت من غير ما يقربلهم. ونستفاد من ده اننا نبقي متاكدين ان في حاجات كتير جدا في حياتنا بنخاف منها وهيا متستاهلش,بل واحيانا بنكون خايفين حتي من مجرد خوض التجربه بتاعتها مش السير فيها.
وكانت جميله اوي قصه الراجل اللي بيتهته,راجل بيتهته وراح لواحد صاحب مكتبه وقاله انا احسن بياع في الدنيا....وزن عليه عشان يشغله عنده وشكل الراجل كده كان زهقان منه ومش عايز عايز يشغله قام اداله كام موسوعه يبيعها(طبعا انت تبقي محترف لو عرفت تبيع موسوعه واحده في السنه,مين ده اللي بيشتري موسوعات), المهم, 5 دقايق والراجل جايله وبايعها,صاحب المكتبه استغرب,اداله شويه موسوعات تاني يبيعها,باعهاله,ازااااااااااي؟.......ازاي ياعم انت بتبيعهم وبسرعه كده,راح الراجل اللي بيتهته قاله,بروح للواحد واقوله,لو مشترتش مني الموسوعه هقراهالك كلها....ههههههههههههههه.
شفت ازاي استغل عيب فيه وميأسش.
اما دي بقي حصلت في الدوره وادامنا. الراجل حب يعمل تمرين يخليك واثق في نفسك,قام جايب صندوق صغير ومتغطي, وقال مين ياجماعه بيخاف من الحاجات زي الحيوانات والحشرات وكده.....في بنت اول ما سمعت كده اتخضت وقالت..أأه, انا, استاذ محمود لو في حاجه هنا قولي اطلع انا بخااااااف.
هههههههههه,المهم,الراجل قال انا عايز 5 من الناس اللي بتخاف دي والله ماهيحصلهم حاجه,طلعله ال5 وكانت البنت دي هيا اولهم(وطبعا هو اللي طلعها).
المهم,قال جوا الصندوق دا في حاجه,الكبير منها بيموت وليها انياب,بس والله والله اوعدكم انها مش هتاذي,اخرها خربشه,مين بقي عنده الشجاعه والثقه انه يحط ايده 5 ثواني بس وياخد 50 جنييييييييه. هو كان مركز علي البنت اياها ودخل ال4 التانيين,يمين شمال يحاول في البنت يشجعها,شويه تستجيب وشويه لا. هو كان بيفاصل في المبلغ اللي هيديهولها,بس لما وصل لل50 اتشجعت شويه.........المهم,في الاخر حاولت بس طلعت ايديها قبل ما تكمل ال5, ولما الراجل كشف الغطاء عن الصندوق طلع فيه ايييييييييه؟؟؟؟؟؟؟؟؟!!!!!!!!!................طلع فيه بنت صغيره......هههههههههههههه.
الشاهد,لو كانت البنت دي(زي ما قال) اخدت نيه صادقه انها تاخد الفلوس دي مثلا عشان تطلع منها جزء كبير لله,كان الموضوع هان عليها.


  • قالنا برده في الاخر, ايه بقي الخطوات اللي ابدأ اشتغل فيها وانفزها فعلا:
1- اشوف نقط ضعفي واقويها,ونقط قوتي وانميها.
2- لازم ااخد دوره(دوره,مش ندوه في ساعتين) في التخطيط ودوره في الاتصال.


  • نصيحه: من النصايح اللي قالهالنا,لما حد يعاديك متعرفوش انك عرفت انه بيعاديك او متحسسوش انك زعلان منه...بلاش تمكن حد انه يحس انه غلبك ونزفزك...وطول ما انت عايش في الحياه,طول ما انت هتلاقي اعداء ولصوص نجاح كتير,ولو ملقتش ده,يبقي فيك حاجه غلطط!!!!!!!
كمان العيل الصغير لما بيعمل حاجه ولقاك اتنرفزت,بيعمل تاني عشان يستفزك,ولما يصرب نفسه ويلاقيك ضحكت,بيضرب نفسه تاني عشان يضحكك برده.


  • من اجمل ما قيل: انا مرن مش لين.
كتير اوي لما بنخلط بين الاتنين, عشان انا طيب مع الناس الناس بتفتكرني اني لين وانا بعد كده بوصل للمرحله دي مع نفسي اني بحس نفسي لين.لا,انا مرن وفرق كبير اوي بين المرونه واللين.....المرونه يعني الاستجابه للمتغيرات اللي بتحصل حواليك والتفاعل معاها بكفاءه بما يفيدك في تحقيق اهدافك....انما اللين: هو انك تكون ضعيف الشخصيه الناس تستعبطك.


  • الله علي الاختلاف والشهاده للتاني بالفضل؟
كان الامام مالك والامام ابوحنيفه في موضوع كده كل واحد فيهم ليه فيه راي مختلف عن التاني.....وحصل بينهم حوار عشان كل واحد فيهم يقنع التاني بوجه نظره,لكن محدش فيهم اقتنع بوجهه نظر التاني.
بعد المناقشه دي,سئل تلامذه الامام(تقريبا مالك,مش متاكد للامانه العلميه) الامام ابوحنيفه عن ايه اخبار المناقشه....قالهم ابوحنيفه: اني وجدت جبلا من العلم.
ولما سألوا الامام مالك(وكان العرق باديا عليه من شده الجذب والشد في المناقشه حتي ظن التلاميذ انه غلب"بضم الغين") عن الامام ابو حنيفه قال: والله لو اراد ابو حنيفه ان يقنعك ان هذه الساريه(العمود المصنوع من الحجاره) مصنوعا من الذهب لاقنعك.
شايف كل واحد فيهم بيقول ايه عن التاني: مش احنا, لما الواحد فينا يختلف مع حد تاني يسفهه ويقول عليه عبيط ومش بيفهم حاجه....لما دكتور يغلط في حاجه نعمم الموضوع عليه ونقول عليه كذا وكذا...........الرحمه ياناس.....واهديني يارب.


  • ييجي برده حاجه جميله اتقالت في الموضوع ده ومهمه جدا:
وهي لو انا كنت بنظام معين...بتكلم كلام وحش,مش منظم في مواعيدي,اي حاجه وحشه او عاصــــــــــــــــي, وخلاص اتغيرت وعايز اعرف الناس اني اتغيرت(اصحابي يعني) اعمل ايه, هل اقولهم ياجماعه انا اتغيرت,اعملوا حسابكوا علي كده,شوفوا اازاي انا اتغيرت.......................الجواب...لا طبعا!!!!!!!!!!!!
امال اعمل ايه........معملش حاجه, اخلي افعالي هيا اللي تتكلم عني, الفعل اقوي من 60 كلمه,هما لما يشوفوا ازاي كنت بخاف الاول من المواجهه ومعنديش القدره علي مواجهه الناس والكلام ادامهم,ازاي دلوقت انا بدي محاضرات والاف بيجوا يسمعوني...هيقولوا سبحان الله لوحدهم من غيرما انت تقولهم اي كلمه.
عايز تتغير اتغير......خايف من الناس,محدش هينفعك,مش عارف تقولهم ايه,مادام انت مقتنع باللي بتعمله سيبهم يقولوا اللي بيقولوه وهما لما يشوفوا الصدق والالتزام فيك مش هيتكلموا عنك غير بكل خير.........ده لو اصحابك(اللي بيحبوك) مش رفقاء السوء او اعداء النجاح.


  • موقف تاني لاح في الافق......دلوقت الافضل اني لما ابقي ادام موقف ومحتاج مني اني اطاطي راسي ليه,هل اطاطي راسي ولا اتمسك برايي واللي يحصلي يحصلي؟
الجواب...من التاريخ الاسلامي الاتنين حصلوا والاتنين صح ان شاء الله.الاول: لما كان الصحابي عمار بن ياسر رضي الله عنه محتجزيه المشركين وبيعذبوه هو واهله ومكنوش هيسيبوه غير لما يسب النبي عليه الصلاه والسلام....وعمل كده سيدنا عمار رضي الله عنه,والرسول عليه الصلاه والسلام اقر ده ومكنش فيه حاجه وقال كمان(عليه الصلاه والسلام) " صبرا ال ياسر,فان موعدكم الجنه".
الموقف التاني موقف سيدنا عبدالله ابن حذيفه,لما كان هرقل الروم محتجزه هو والمسلمين وقاله ارجع عن دينك,مرضيش,عرض عليه كل انواع العذاب والخوف وبرده مرجعش ولا استخدم الرخصه اللي ربنا ادهاله....قال تعالي" الا من اكره وقلبه مطمن بالايمان" صدق الله العظيم.
ومسابوش هرقل الا لما قاله اسيبك لما تقبل رأسي,بس سيدنا عبدالله قاله تسيبني انا والمسلمين كلهم...وافق هرقل...سيدنا عبدالله شاف انه مفهاش حاجه لان فيها مصلحه المسلمين وباس راسه واطلق سراحه ولما عرف بكده سيدنا عمر بن الخطاب رضي الله عنه وكان امير للمؤمنين وقتها قال واجب علي كل مسلم تقبيل رأس سيدنا عبد الله,وكان سيدنا عمر بن الخطاب رضي الله عنه اول واحد مقبل راسه,رضي الله عنهم جميعا.


  • حكمه: قال سيدنا علي بن ابي طالب رضي الله عنه" قيمه المرء فيما يتقنه/يحسنه".


  • اخر حاجه خالص بقي كانت ايه المراجع والكتب اللي نرجعلها:
1- كتاب " كيف تخطط لحياتك" د.صلاح الراشد+الاسطوانه الصوتيه المرفقه مع الكتاب.
2- فيديوهات/صوتيات رتب بحياتك د.طارق السويدان.
3- كتاب استمتع بحياتك د.محمد العريفي(والكتاب ده بيتناول مهارات الاتصال والعرض)
4- كتاب صناعه القائد د.طارق سويدان
5- كتاب رباعيات القياده د.طارق سويدان.
برده الدورات دي مهمه:
كيق تخطط لحياتك-مهارات الاتصال-مهارات العرض.
  • واخيرا, الايميل الشخصي للاستاذ الكريم محمد محمود:
m_mahmoud111@yahoo.com

2 comments:

  1. Al salam 3alukom

    Actually I read more than topic in your fantastic blog .but, I didn't find words describe how much I make useful from it .
    But this topic force me to make a comment may be this is the most attractive topic or because I have many troubles with it.
    May be not only me but also a lot of my friends have a same problems. We don't have self –confident because we don't know where we should be, which thing we be interest when we do?????? All things the same. Actually I don't know what is the thing I have self –confident in it .as u said
    ,بمعني اني انا واثق في قدراتي في موضوع معين مثلا,في التدريس,في الرياضه,في الالقاء ادام الناس, في ذكائي....
    May be u say that: I said the trust in ALLAH not ourselves I agree with u but If I make my best effort in some thing. Which I couldn't find until now!!!!!!
    I am very sorry for elongating .and thank u for all advices u said .




    Best wishes
    The student

    ReplyDelete
  2. One minute, I'm not saying that to disagree with u. But I guess u may have appropriate solution for this case.

    The student

    ReplyDelete