د/أحمد بهجت........قصه نجاح

بسم الله الرحمن الرحيم

النهارده حضرت ندوره كانت عاملاها الجامعه ومستضيفه فيها الدكتور احمد بهجت..رئيس ومؤسس شركات بهجت.

كان يوم جميل,شخصيه تسحرك,مليانه علم وثقه بالنفس وقصه نجاح.....ورغم ان عنوان الندوره كان قصه نجاح..يعني المفروض كان يحكيلنا قصه نجاحه الا انه كان ليه تخطيط تاني عشان زي ما هو كان شايف ان قصه نجاحه ممله والناس سمعتها كتير,فحب يقول كلام للطلبه يفيدهم اكتر من قصه نجاحه من وجهه نظره.

الدكتور بهجت خريج هندسه اتصالات والكترونيات,ومعاه بكلريوس علوم رياضيه جنب بكلريوس الهندسه اللي معاه,واخد ماجستير ودكتوراه من امريكا.....ما شاء الله عضو في حاجات كتيييييييييير.......راجل اسطوره من الاخر.

المهم,اول ما اتكلم قال انك لازم تفكر بره الاطار العام اللي انت محطوط فيه....لازم تفكر بره اطار انك موظف بتروح الشغل من الساعه كذا للساعه كذا وبس علي كده,لا, لازم يكون ليك تفكيرك وعملك الخاص اللي بيساهم في البلد.

نعيد تاني,اول حاجه لازم اعملها لنفسي اشوف البرواز اللي اتحطيط فيه ايه ابعاده,وعشان ابدع,لازم اخرج بره الاطار ده وافكر في حاجه تانيه وجديده....مش لازم ابدا اتقيد بالنظام المفروض عليا لو كان روتيني......ولازم ابدع في النظام اللي انا فيه ومبقاش روتيني.

سألنا…… الخريج دلوقت ممكن ياخد كام اول ما يتخرج..لقينا كلنا انه بياخد ملاليم.....فقلنا رغم صعوبه الحياه والظروف اللي احنا فيها,الا اننا ممكن ناخد من ده عامل محفز يشجعنا علي اننا نخرج من الاطار اللي احنا فيه ونبدأ نفكر في اساليب عيش تانيه وطرق ووسائل وافكار تجيبلنا فلوس........يبقي احنا لازم نستثمر الظروف اللي احنا فيها اننا نخرج بأفكار ابداعيه جديده وحاجات تنهض بينا,مش نقعد نندب حظنا.

وكان اغلب كلامه عن الاستثمار في السودان وازاي هما شعب ذكي جدا,اذكي مننا كمان بس بيحبوا الرجاله اللي بيحبوا يشتغلوا,وقالنا انه عايز شباب يكون عندهم الاستعداد انه يمولهم ويخليهم يفتحوا مصانع صناعات مغذيه ليه في السودان وكلما سنتين ويبقوا مليونيرات...........بس لازم يكونوا رجاله وعندهم الاستعداد وعايزين يشتغلوا فعلا.

قالنا انه كان بيدي ندوه في هندسه القاهره تقريبا للمهندسين الخريجين وقالهم علي فكره السوادن دي.كان حاضرله حوالي 400 او 500 واحد.....محدش راحله بعدها باي فكره,مفيش غير واحد راحله وقاله انا عندي فكره بس عندي جيش,اخلصه واجيلك!!!!.....................والدرس المهم اوي من ده,ان راجل اعمال زي احمد بهجت بيقول للشباب عايزين تبقوا مليونيرات,تعالوا واحققلكم حلمكم...بس رغم ده محدش راحله,والراجل جاتله خيبه امل كبيره في الشباب........دا درس بسيط اوي تتعلمه انك ممكن تعمل اللي عليك وتتعب اوي وتتفاني انك عايز تساعد اللي ادامك,بس هو ولا كأنه هنا ومش بيستجيب.......فحط دي في حساباتك وفي خبرتك في الحياه عشان متيأسش....اديه برده بيعرض نفس العرض للشباب في اسيوط وهنشوف في حد هيكلمه ولا لأ.

قالنا برده انه كان بيشتغل في الصيف عشان يوفر لنفسه معيشه كويسه في الشتا...اشتغل كل حاجه,وحكالنا علي يوم من ايامه زمان لما كان بيتدرب في مصنع في النمسا.............كان بيروح الشغل ويبدأ الساعه 7 الصبح ويخلص شغل الساعه 4 العصر,يبيع جرايد لحد 10 الليل,يروح وينام ويصحي تاني الساعه 4 الصبح عشان يعرف يكون في المصنع الساعه 7 الصبح تاني...........................الخلاصه: الناس دي مبقتش كده وموصلتش للي هيا فيه ده الا بتعب وسهر وعزيمه وهدف وقبل كل شيء توفيق ربنا......مش هينفع انام وانام واحلم واقول عايز وعايز وانا مش بعمل حاجه ولا بتعب في حاجه.....الدنيا مش انا عايز وبس,الدنيا انا عايز,يبقي هدفع,وعلي قد ما هدفع,علي اد ما هاخد,ربنا مش بيضيع تعب حد,لو عايز تسمع لليائسين اللي معملوش نص اللي عملته بس بيقولولك عملنا وسوينا وهما ولا عملوا حاجه ويهبطوا عزيمتك,هتلاقي نفسك في الارض..........خليك واثق في الله واتعب واشتغل وهتلاقي ربنا كرمك ووفقك.

من الحاجات الجميله اللي حكاها قصه بدايته..........كان هو معيد وكان في قعده كده مع ناس جامعيين برده كلهم بيحضروا دكتوراهات......واتكلموا عن مشكله المسلمين في امريكا انهم مش بيعرفوا مواقيت الصلاه ولا اتجاه القبله عشان امريكا فيها بلاد كتييييير اوي,وقالوا انه في دكتور عامل المعادلات الفلكيه الخاصه بالموضوع ده..........احمد بهجت لانه انسان مش عادي,استفاد من القعده العاديه دي واخد الفكره ودور في الموضوع وجاب الابحاث اللي علي الموضوع ده واشتغل فيه 3 سنين لحد ما عمل جهاز يجيب مواقيت الصلاه واتجاه القبله في اي مكان في العالم. ومركز الابحاث اللي في امريكا اشتري منه الفكره دي بمليون دولار والمركز اللي كان بيسوق المنتج وبيشحن وبيعمل كل حاجه..........المليون دولار دي هيا اللي بدأ بيها وبدأ يعمل مصانع تليفزيون وفيديوهات وبعدين ميكرووييف وبعدين ثلاجات وبعدين رخام واساس ودا اصل اسطوره احمد بهجت.........كلمه في قعده بس اشتغلها صح................سبحان الله علي القدر,تحس ان الحياه فرص فعلا بس اللي يعرف يشتغلها وفعلا تعريف الحظ هو انك تكون مستعد عند الفرصه.............واحد تاني واحد صاحبي حكالي عليه,الراجل ده في ناسا ولسه صغير بتاع 30 سنه كده. الراجل ده خريج علوم ودخلها اصلا وهو مش بيحبها وكان يعرف واحد من جيبوتي كان عايز يخلص ورقه في السفاره فراح معاه.هناك لقي اعلان عن منح لفرنسا,قال اقدم,وقدم في كل جامعات فرنسا ماعدا جامعه باريس لانها كبيره جدا ومستحيل تقبل واحد لسه فريش كده.كل الجامعات رفضته,بعت لجامعه باريس بقي وسبحان الله اتقبل....اشتغل معاهم كويس وهو بيعرض جزء من ابحاثه هناك في مؤتمر كان في واحد قاعد من ناسا..عجبه,كلمه,اخده معاه في ناسا.............. سبحان الله.................كل المواقف دي بتعلمنا انك لازم تشتغل وتتعلم وتتعب وتستغل وقتك صح,لانك متعرفش الفرصه جايه امتي ولا ازاي,فتعمل اللي عليك دايما عشان تبقي مستعد لما الفرصه تجيلك وبالتالي يبقي حظك حلو.

من التحديات اللي حكالنا عليها ازاي كان صعب جدا ياخد موافقه لانشاء مصنع وقتها,لانه كان كله حكومه وكان لازم عشان يبني مصنع ياخد موافقه القطاع الحكومي انهم موافقين انه ينافسهم,وقعد يحاول 3 سنين ووصل لاعلي المستويات حيث ان كان هناك وزير بيساعده وواقف جنبه,كل ده وخد الموافقه بعد 3 سنين........شوف دلوقت احمد بهجت بقي ايه ماشاء الله...........علي اد الصعوبات اللي بتواجهها,علي اد النجاح اللي بتاخده.

ولو بصيت بنظره تاني لبدايه حياته,هتلاقيه انه واخد بكلريوس رياضه وبكلريوس هندسه........احنا دلوقت نقول ماشاء الله,ايه ده ياعم...........بس لو بصيت بنظره اعمق شويه وفكرت في معيد في هندسه عايز ياخد الماجستير بتاعه ويلاقي نفسه لازم يدرس رياضه عشان يفهمها,ودخل جيش كمان في الفتره دي,هتلاقي ان ده وقتها كان تحدي,مش فرصه او حاجه حلوه ممكن يكون فرحان بيها(الله اعلم بنفسيته وقتها,دا رايي انا).......يبقي صح,علي اد التحديات والمصاعب,علي اد النجاح.

شويه نصايح جميله قالها من خبرته في الحياه:

قالنا ان الناس عايزه تعيط عليك لما تخسر,انما مش عايزين يفرحولك لما تنجح.........فعلا,تلاقي الواحد بيكسر في مقاديفك ومش هتقدر وانا عارفك وبحبلك الخير بلاش دي,ابعد عن السكه دي.....ولما تخسر,يقولولك معلش اصبر ربنا معاك ويعيطوا عليك.........انما نادر لما تلاقي حد فرحلك لما تنجح.

قالنا انك تفكر ازاي تنجح......انما متخليش كل تفكيرك وهمك ازاي فلان يخسر. فاانا مليش دعوه بغيري,انا ليا دعوه بنفسي وامكانياتي اني انميها وابقي انسان قوي وناجح........برده,التنافس مهم عشان بيخرجك بره منطقه الامان النفسي اللي انت فيه وبيخليك تكسل لتنطلق وتبدع وتفكر وتخترع.......عشان كده التنافس مهم ومفضل وصحي للانسان الناجح. عشان كده الرياضه في مصر فاشله,لانها رياضه الفريق الواحد اللي بيعتمد علي كسر الفرق الصغيره,انما لو في تنافس,كانت الرياضه المصريه في قمتها.

حاجه قالها عن نفسه: انه ميحبش يعمل الحاجه نص نص,يحب يعمل الحاجه ويوصل بيها لدرجه الكمال ان جاز التعبير........ولما واحد سأله لخصلي خبرتك في الحياه في جمله واحد قاله" بيع اللي الناس عايزه تشتريه ,مش اللي انت عايز تبيعه...بكده هتنجح لان زبونك دايما موجود"

وفي الختام....قال انه علي استعداد لتبني كل الافكار الجديده والخلاقه والمهم جدا انها تكون قابله للتطبيق لانه ملوش في شغل النظري.......وقال ان مجال الطاقه الشمسيه من المجالات المهمه جدا وان عندنا ثروه طبيعيه كبيره في مصر لازم نفكر فيها ونستغلها كويس.

برده الدكتور رئيس الجامعه قالنا اللي عنده فكره وعايز يطبقها يعمل بيها Proposal ويعرضها علي الجامعه والجامعه عملت مركز متبني للصناعه وهيتبني اي فكره جديده وقابله للتطبيق ان شاء الله.

اخيرا,الدكتور احمد بهجت قال ان الوصول ليه سهل جدا وانه علي استعداد لتبني وتمويل اي فكره جديده وقابله للتطبيق,وطرق الاتصال بيه عن طريق السكرتاريه اللي تليفوناتهم:

0122113535

38553220

والسلام عليكم ورحمه الله وبركاته.