Sunday, November 16, 2008

استراتيجيات واساليب التفكير الابداعي

بسم الله الرحمن الرحيم

النهارده انا جايب خلاصه قرايتي وفهمي لبعض الفصول من كتاب حلو عن التفكير الابداعي او الCreativity thinking.

الكتاب بالانجليزي وانا حاسس اني لو ترجمته بالعربي هيبقي بايخ ومش حلو.عشان كده انا هكتب جمل نصيه من الكتاب وهعلق عليها ان شاء الله بالاضافه اني كاتب حاجات بالعربي مستنتجها من الكتاب علي طول دون كتابه الاصل الانجليزي لها............................ودلوقت نبدأ ان شاء الله.


الابداع فطري في الانسان.كل انسان خلق وليه مقدار من التفكير الابداعي موجود جواه فهو بطبيعته مبدع وبيبدع وان اختلف مقدار الابداع وتفاوت بين الناس,فالفكره مش اننا عايزين نتعلم ازاي نبقي مبدعين,الفكره اننا عايزين نتعلم ازاي نبدع في الوقت اللي احنا محتاجين نبقي مبدعين فيه.

When you come up with a new idea, big or small, think about its potential long-term effect.
معني الكلام ده: انك لما تفكر او تصادف فكره جديده,مترفضهاش علي طول مهما كانت صغيره او كبيره بل فكر في التاثير طويل المدي ليها.قد تفكر في اختراع ملوش تطبيق دلوقت بس بعد 20 سنه هيكون ليه اثر كبير جدا,وهكذا.


It has often been said that a bad idea is like a virus. It lives, it grows, it sustains, it spreads.
معني الكلام ده ان الفكره السيئه او الرسائل السلبيه للنفس عامله زي الفيرس.بيكبر وينمو وينتشر.عشان كده متقولش لنفسك رسايل سلبيه عشان ممكن تكبر جواك وتعيش فيها وتموتك.


Practice doesn’t make perfect. Only perfect practice make perfect.
يعني مش اي ممارسه للحاجه بتوصلك للنجاح والاحتراف فيها. فقط الممارسه الذكيه الفعاله هيا اللي بتخليك ذكي وفعال.


الجلوس بوضعيه صحيحه مهم جدا انك تكون مبدع........لازم جسمك يبقي متقسم علي الكرسي,مش تبقي موطي علي المكتب.

عشان تعرف تتخيل,لازم تخرج من اطار المحيط اللي انت فيه واسرح براه شويه....هتلاقي افكار ابداعيه جتلك....كل لما كترت المعلومات عنك,كل ما زادت القيود او الحدود اللي خيالك هيقف عندها,عشان كده لو عايز تتخيل(وده من وجهه نظر الكاتب,انما انا ليا ملاحظات علي الكلام ده) يبقي لازم تخرج بره الاطار المعرفي اللي انت فيه.....لازم تخرج من عالم المعرفه لعالم اللامعرفه حيث الافكار الجديده والخيال الخصب.

فكره جديده للتحصيل الدراسي وممكن نطبق بيها الكلام اللي فات ده.قبل ما تبدأ تدرس حاجه جديده او موضوع جديد, فكر فيه, لو مثلا بتدرس فيزيا,اقرا مقدمه الموضوع وخد عنه فكره بسيطه وبعدها خش علي المسائل علي طول. قرايتك للمسائل من غير ما تبقي عارف الموضوع بيتيحلك حاجتين:
اولا: انه بيخليك تكون أساله كتير في الموضوع ده وطول ما انت بتسمع الشرح بعد كده دماغك شغاله بتفكر في اجابات للاساله اللي انت حطيتها لنفسك وبكده تحصيلك هيبقي كبير جدا.لانك اتحولت من متلقي للمعلومه الي باحث عن المعلومه.
ثانيا:انك وانت بتقرا مقدمه الموضوع او الاساله المطروحه عليه,بتشغل دماغك في اللامعرفه,وبالتالي بتفكر في حلول ابداعيه مفيش شقف معرفه موقفها,فا انت بكده بتبقي انطلقت بدماغك لمساحات كبيره كده وممكن بعد كده لما يبقي عندك المعرفه بدل ما يكون سقف ويوقفك عند حد معين,تبقي المعرفه بالنسبالك مصباح او مرشد بيوجه افكارك الابداعيه الجديده دي توجيه سليم.



It takes me all my life to have the mind of a child.
الجمله دي قالها بيكاسو,ومعناها جميل اوي...........طوال حياته عايز يبقي مبدع,وهو شايف ان الابداع بيكون في مرحله الطفوله, وده بيرجعنا للنقطه اللي اتكلمنا فيها قبل كده,لما تزيد معرفتك,بتتخيل في اطار بتبقي محتاج انك تخرج منه.............ملمح مهم برده: مرحله الطفوله دي مرحله مهمه جدا في حياتنا وفي حياه اطفالنا,في حياه اطفالنا لانها مرحله خروج الطاقات بتاعتهم اللمتناهيه والغير مهذبه والعشوائيه,فلازم ندرسها ونفهمها. ومهمه لينا لان الاطفال بيكونوا في مراحل ابداع عظيمه جدا لازم نراقبها ونسجلها ليهم عشان نعرف نتابعهم ونعامل كل طفل منهم بالاسلوب اللي يناسبه,وعشان يمكن نستفيد من ابداعهم وافكارهم المجنونه دي في حاجه مفيده كبيره في الواقع.


الابداع من اساليبه مواجهه المشاكل. فانت عندما تتعرض لمشكله,فانت تفكر في كيفيه حلها,وكلما كانت المشكله جديده,كلما كان الحل ابتكاري ومبدع. عشان كده المفروض اننا لما تواجهنا مشكله,نستعين ربنا عليها ونقبلها علي انها تحدي عشان يرفع قدراتنا,مش حاجه عشان تعجزنا وتيأسنا.
ايضا من تعريفات الابداع هو انك لا تنتظر المشكله حتي حدوثها عشان تيجي بحل جديد,ولكن انك تفكر في شيء جديد يحفز الهمم ويخلي الافكار الابداعيه تطلع من الناس اللي شغالين معاك.

من استراتيجيات التفكير الابداعي انك تسأل نفسك سوال جديد,مش تقليدي........ده بيوديك لمنطقه المشكله الجديده اللي اول مره تقابلها وبالتالي بتفكر تفكير مش تقليدي.
ومن هنا ممكن نقول برده من اساليب التعليم الصحيح: ان لما حد يسألك بسوال,جاوب عليه بسوال....خليه هو اللي بيتخلص الاجابه مش انت اللي تلقنهاله.



لو كان عندك مشكله او موضوع مثلا وادامك مده اسبوع مثلا عشان تفكر فيه وتطلع ليه بحلول.اذا انا خصصت يوم واحد مثلا عشان افكر في حل للموضوع ده فانا كده كاني فكرت دقيقه واحده.لاني بفكر بنفس العقليه ونفس النمط ونفس الظروف المحيطه اللي بتأثر فيا فبالتالي ياما مش هوصل لحد خالص,ياما كل الحلول اللي هوصلها هتكون زي بعض لان نفس العوامل دخلت في تكوين الحل ده..............انما لو علي مدار الاسبوع فكرت كل يوم 10 دقايق مثلا,كل يوم بظروف جديده بنفسيه جديده بطريقه جديده,هكون طلعت بحلول كتير جدا ابداعيه.
لو عندك مشكله او موضوع محتاج حل, احجزله في مخك مساحه بس وكمل شغلك عادي في الحياه,عقلك الباطن هيكون بيفكر في حلول كتير للموضوع.
ملاحظه مهمه: مش عشان قلت اسبوع ويوم تبقي المده كده,لا,ممكن في يوم تفكر في ساعه متواصله وممكن خلال اليوم ده تفكر في كذا وقت مختلف وتبقي طبقت نفس الطريقه.



لما تكون عايز تفكر تفكير ابداعي,وانت بتفكر متحكمش علي الفكره خالص......فكر وبس. عشان لو حكمت علي الفكره تبقي بكده عملت غلطتين:
اولا: انك ضيعت وقت كتير اوي في الحكم علي الافكار كان ممكن تستغله انك تيجي بيه بافكار جديده ابداعيه..الفكره بتبجي في نانوثانيه.
ثانيا: انك بكده هتخلي العوامل النفسيه تأثر فيك,لو ابتكرت فكره من وجهه نظرك مش ذكيه او تقليديه او غبيه حتي,هيأثر ده علي نفسيتك وعلي انتاجك للافكار الجايه وممكن يضطرك للتواقف.




Good is the enemy of great.
معني الجمله دي اني اه ممكن اكون جبت حل كويس او وصلت لمكانه عاليه في المجتمع او او. ده كويس اه. بس انا كده دخلت منطقه الامان النفسي وبطلت ابدع.في الحاله دي ميبقاش كويس,لان كان في افضل كان ممكن اوصله لو كنت كملت شغل وعمل.................يبقي انا لازم اخلي النجاح السابق وسيله واسلوب دافع لنجاح قادم واقوي وافضل.



The best scientists failed more than the average scientist.
جمله جميله جدا وحقيقيه. كل العلماء اللي مازال ذكرهم موجود في الدنيا دي تعبوا اكتر من اي حد تاني. زي ما اشرت سابقا عن قصه كنتاكي في موضوع التخطيط. وزي ايديسون لما عمل المصباح بعد 999 محاوله فاشله وقال للناس انا استفدت معرفه 999 طريق خطأ للوصول للمصباح,زي ما الاطباء نجحوا في موضوع اطفال الانابيب بعد 99 محاوله فاشله مش 10 ولا 20. كل ما تجتهد,كل ما تاخد خبره,كل ما تبقي اكثر علما.



قد يكون الخوف شعور جيد وطبيعي في التفكير الابداعي,لان الخوف من الفكره دي ممكن يكون عشان فكره جديده ولم تجرب من قبل....البعض بيستدل بالخوف علي ابداعيه الفكره بس انا ليا تحفظات علي النقطه دي,لان ممكن الجبان يخاف من خياله,وممكن تكون الفكره تقليديه جدا بس اللي عايز ينفذها واحد خواف بطبعه.


ابسط طرق التفكير الابداعي مش انك تعصر دماغك عشان تطلع بالفكره العبقريه.......لا,انت ولد افكار كتير,فكره وراها فكره,توليد افكار,بعد كده افرز الافكار دي وصنفها وهتلاقي نفسك طلعت بكذا فكره ابداعيه.


من طرق التفكير الابداعي الطريقه العكسيه 180 درجه......وهيا بالمختصر الشديد انك بتروح بمخك 180 درجه عن الشيء او التفكير التقليدي. فحتي لو ملقتيش حل من تطبيقك المبدأ ده,لما تلف بمخك 180 درجه,علي الاقل هتكون رحت لمكان جديد خصب انك تزرع الابداع فيه.


Collaborate with genius.
دي طريقه من طرق التفكير الابداعي.بالمختصر المفيد: تخيل نفسك واحد من العباقره وفكر,هتلاقي نفسك طلعت بافكار مكنتش هتطلع بيها لو فكرت عادي.مثلا, حط نفسك مكان نيوتن وتخيل نفسك نيوتن وفكر في الموضوع,هتلاقي حلول تانيه خالص عن لما محمد او حسين او او او فكر فيها.



في طريقه تانيه لحل المشاكل في الاصل اسمها القبعات السته. بتتخيل انك هتلبس 6 طواقي,كل طاقيه ليها لون. تقريبا اصفر واحمر وابيض وازرق واسود واخضر. كل لون لما بتبلس الطقيه بتاعته بتفكر علي اساس اللون ده. فلما تلبس الطاقيه السودا,فكر تفكير متشائم,لما تلبس الخضرا,فكر تفكير متفائل,وهكذا........لما تلبس ال6 طواقي دول هتلاقي نفسك في الاخر طلعت بافكار كتير في كل الجوانب,وتقدر تعمل مفاضله بينهم وتاخد القرار السليم باذن الله.


وفي النهايه,اتمني مكنش طولت عليكم,ومتنسونيش من دعائكم,والسلام عليكم ورحمه الله وبركاته.





References:
The do it yourself lobotomy-Open your mind to greater creative thinking
"Tom Monahan",Creative thinking coach

5 comments:

  1. من الاستراتيجيات المهمه اللي احب اضيفها:

    لما يكون عندك مشكله وعايزلها حل. فكر في الحل بتاعها والفكره اللي هتجيلك امسك فيها بايدك وسنانك واوعي ترفضها من الاول.

    كتير مننا بيرفض الفكره اول ما يفكر فيها لصعوبه تحقيقها في وجهه نظره. انا مقتنع حاليا ان حصولك علي الفكره في حد ذاته نص الطريق,النص التاني: انا احقق الفكره دي ازاي.

    اللي خلاني اقول كده ان مهندس مصري عايش في المانيا كان عايز يحفر نفق وكل ما يحفر المياه الجوفيه تغرق الدنيا. كان حله انه يجمد المياه اللي تحت الارض. رغم عبقريه وابداعيه الفكره,الا انه مرفضهاش,بل فكر في الوسائل اللي تتيح تحقيق الموضوع ده.

    عشان كده ولد الفكره,وبعدين فكر في تحقيقها,مترفضش الفكره اول ما تجيبها لاي سبب كان.

    بدرت

    ReplyDelete
  2. موضوع جميل جدا بس ياريت توضيح جزء مش مفهوم بالنسبة لىّ" من طرق التفكير الابداعي الطريقه العكسيه 180 درجه......وهيا بالمختصر الشديد انك بتروح بمخك 180 درجه عن الشيء او التفكير التقليدي. فحتي لو ملقتيش حل من تطبيقك المبدأ ده,لما تلف بمخك 180 درجه,علي الاقل هتكون رحت لمكان جديد خصب انك تزرع الابداع فيه"
    أفادكم الله ويجعله فى ميزان حسناتك بإذن الل ويجعللك من المبدعين المتميزين إن شاء الله
    وشكرا للإستفادة

    ReplyDelete
  3. سلام عليكم عزيزى القارىء:

    شكرا على قراءتك ومتابعتك وتعليقك واسمحلى اجيب على النقطه اللى سالت عليها.

    الطريقه العكسيه دى واللى مكتوب عنها انك بتروح بمخك 180 درجه عن التفكير التقليدى المقصود منها: ان فى حاجات واقعيه او تقليديه معروفه للجميع. مثلا: انك عشان تتعلم هندسه لازم تدخل كليه الهندسه, دا شىء اساسى وتقليدى, بس لو فى مشكله فى الاماكن ومتقدرش تبنى كليات جديده. العكس تماما لانك تروح كليه الهندسه هو انك متروحش كليه الهندسه. طب هل ينفع تبقى مهندس وانت فى البيت؟ دا يوديك لفكره التعليم الالكترونى او التعليم عن بعد ومحاضرات الهندسه المسجله فيديو واللى بتخليك تعيش المناخ المرتبط بالتعليم الهندسى الى حد ما. فانت لما عكست طريقه تفكيرك, جبت حل ابداعى جديد. وان مكنتش هتقدر توصل لحل مباشره من عكس التفكير, هتبقى رحت لمنطقه جديده خصبه للتفكير بمعنى انه تحررت من القيود اللى فى ذهنك وبتفكر فى الموضوع من منظور جديد مختلف.

    وفى النهايه احب اوضحلك, ان دى طريقه او اسلوب. لا يشترط ان يعطى حل فى مواقف معينه. ولكن له مواقفه التى عند تطبيقها يأتى اليك بحلول ابداعيه.

    والله اعلم, وشكرا لزيارتك مره اخرى, واتمنى اكون قدرت اوصل النقطه بوضوح, واسف على التأخر فى الرد

    ReplyDelete
  4. جزاك الله كل خير المعلومة وضحت وكنت بستأذن حضرتك يابشمهندس نقل الموضوع لمنتدى مشتركة فيه للإفادة وطبعا هذكر فيه اسم مدونة حضرتك وده للأمانة أمام القراءوكمان لأنى عايزة ناس أكتر تعرف المدونة الجميلة دى لأن حقيقى خسارة عدم معرفتها وده بعد إذن حضرتك
    والسلام ختام

    ReplyDelete
  5. بارك الله فيكى يابشمهندسه. توكلى على الله, وربنا ينفع الناس بما فيها,وجزاك الله خيرا.

    ReplyDelete